| 既然講起八達通，我決定主動投案－－波多野結衣貼紙就黎完工，好快就會寄到大家府上。而且一如以往我哋所有「MenClub送大禮」一樣，係你收到就收到，收唔到就係冇，唔會有另行通知嘅。OK，咁萬一你真係咁唔好彩拎唔到波多野結衣八達通貼紙，又或者你好好彩咁拎到但又唔夠膽用，仲有冇其他辦法幫張八達通加返些少色彩？有嘅，買個老蓮咁大嘅千歲鷹Suica套笠住佢你點睇？ | |
| |
| 呢個由Crazy Case出嘅千歲鷹Suica套其實早喺上年年尾就出過一次，今次話係因為好好反應所以又加推喎，所以連隻千歲鷹都係用前六集嘅設計(之前有Gents提過新千歲鷹個雷達係方形)，同年尾嘅《Star Wars 7》係冇關係架(應該！)。雖然佢就係一舊膠，不過造功方面其實都好仔細，機上面嘅紋理同排氣口、雷達等等通通都有齊。大細方面約為9.5 x 12.5 x 2.8cm，基本上都有大半隻男人手咁大，再加上佢個面岩岩巉巉，肯定放唔到落褲袋。而放卡個位就啱啱放到一張Suica卡，文青度過同八達通就相差冇幾，所以香港人一樣用得。 | |
| |
| 如果你記性好，你可能會記得Crazy Case早前都有出過個《回到未來》嘅DMC手機殼，而嗰個殼最巴閉就係來電識著燈。而呢個Suica套亦秉承優良傳統，當你用Suica畀錢、過閘時，機尾嘅引擎位就會自動感應著藍燈！好有型！ | |
| |
| 呢個CRAZY CASE TOUCH MILLENNIUM FALCON即日起至11月9日接受預訂，售價為4860Yen(約314港元)，預計11月內會出貨。啱啱好趕得切買黎睇新《Star Wars》！ | |
| P-bandai |
