| OK，長話短說，早幾日有睇過我哋嘅Facebook都知近排Marvel發佈咗一張雷神(Thor)同美國隊長(Captain America)嘅「Love is in the air」相。由於呀徐錦江…我指Chris Hemsworth飾演嘅Thor太深入民心，再加上香港讀者又唔係太有追看美漫嘅習慣，所以好多人都以為Marvel黎緊會出套「BL」新漫。但其實圖入面個雷神，係女人黎－－仲係一個你識嘅女人添！ | |
| |
| 戴個頭盔先，因為美漫實在有太多個平行宇宙，文青又唔係個個都睇過，所以如果以下嘅資料有咩錯漏，就請各位高人指點。首先，講下張圖嘅背景。Marvel喺今個秋天，準確啲講係11月11日將會推出一個涵蓋所有Marvel漫畫、名為「All-New, All-Different」嘅新系列。新系列繼承今年出版、將「Earth 616」以及「Ultimate Universe」兩個平行宇宙融合嘅「Secret War」大事件，故事嘅最後所有平行宇宙都合成一個名為「Battle World」嘅星球。由於新系列根本未出，所以冇人知道劇情實察上係咩，但上面張圖就係2016年1月會出嘅第四期封面添！ | |
| |
| 至於點解雷神會做咗女人?咁又要講到上年嘅「Original Sin」故事。長話短說就係神盾局長Nick Fury殺咗地球嘅「觀察者」Uatu，並利用佢嘅眼球知道所有英雄嘅秘密，從而改變雷神個槌「Mjolnir」嘅使用條件，令到「雷神索爾」(又或者準確啲講，奧丁個仔)，以及奧丁本人都拎唔起個槌。但條件並無限制其他「有資格」嘅人使用「Mjolnir」，於是Jane Foster－－即係電影入面Natalie Portman飾演嘅地球人科學家(正史中為護士)拎起「Mjolnir」，成為新雷神兼且加入埋Avengers。 | |
順帶一提，Jane Forster仲係一個癌症病人，因為接受化療而掉光頭髮。 | |
| 請注意，目前嘅Jane Foster唔係「女雷神」，唔係暫代雷神，而係整個Marvel宇宙中唯一一個、如假包換嘅真「雷神」。真到原本我哋認識嘅「Thor」都要改名做「Odinson」。至於呢位新雷神同美國隊長(以我哋嘅認知，應該係叫Falcon)究竟係一時衝動，定真係新官配呢？就要等到下年先知啦。 | |
