有人話，秋天係一個容易令人憂鬱嘅季節，咁唔知夜闌人靜嘅秋天晚上，會唔會令人加倍「阿愁」呢？如果呢種間歇性唔開心嘅感覺足以令你感到煩厭，可想而知抑鬱症患者長期受負能量影響，感覺係幾難受。

其實都市人好多都有情緒病，抑鬱症係常見嘅一種。可惜抑鬱症唔似得其他病，從表面跡象可以體會到患者嘅辛酸，基本上，只有患者本人，先明白抑鬱症嘅可怕。抑鬱症會令人情緒低落、成日想喊、甚至唔想見到自己。就以自拍為例，一般人都會喺鏡頭前表現自己最好嘅一面，但如果由一個抑鬱症患者揸機，佢會影出點嘅自拍照呢？

21歲嘅攝影師Edward Honaker兩年前患上抑鬱症，佢覺得患上抑鬱症嘅感覺係好難向冇罹患嘅人講清楚，佢表示，患上抑鬱症會好想將自己收埋，唔畀任何人見到，甚至連自己都唔想見到。所以佢就以自拍嘅方式，幫自己嘅情緒搵出抒發嘅渠道︰「當時我飽受抑鬱症折磨，我無法正常表達情感，讓人感到沮喪同絕望，但係藝術能夠觸及人心，呢個亦係我拍攝呢啲相嘅根本原因。」

結果，呢系列自拍照放上網後，引起唔少抑鬱症患者共鳴，亦有人從佢嘅相片中得到安慰。一齊睇吓Edward呢輯相點樣表達出抑鬱症嘅無奈，如果你身邊都有親友有抑鬱症，睇吓可唔可以透過照片，去了解佢哋更深？