光明正大同異性友人約會
朋友呢家嘢，唔係男就係女，但好多時為咗令另一半放心，我哋都會盡量避嫌，少同異性朋友約會，然後慢慢會同呢啲朋友疏離，到失戀時先發現，呢段期間你唔只冇咗情人，仲連呢班朋友都冇埋。

唔需要喺親朋好友面前衛護唔真實嘅佢
為咗令另一半被自己嘅家人朋友接受，我哋都會誇飾另一半點好點好，隱藏佢對自己唔好嘅地方，將佢塑造成一個理想伴侶嘅模樣，但事實上，佢都未必真係咁好，只係為咗令其他人接受佢，唯有將佢吹到天上有地下無咁。不過到最後其實你自己都會心虛。

唔使再扮鍾意佢嘅家人朋友
話就話拍拖係兩個人之間嘅事，但少不免都會同另一半嘅家人朋友有相處互動嘅機會，不過唔係個個人都咁易相處，好多時基於畀面自己嘅愛侶，同埋對長輩嘅尊重，就算你唔鍾意佢嘅父母又或者朋友，都要扮晒Nice。分手後，就唔需要再咁虛偽，對唔喜歡嘅人扮Friendly。

唔使再抱怨
同另一半相處，難免會有啲糾紛冷戰，呢個時候你可能會向對方抱怨，又或者搵親朋好友訴苦，久而久之個人會成日處於負面狀態，令到你自己有壓力，聽嘅人又有壓力。分手後，起碼唔需要再因為另一半嘅事，而周圍同人發放負面能量丫。

做自己喜歡嘅事
拍拖時好多嘢都會配合另一半，例如為對方改變興趣、個人口味等等，當下可能覺得，為咗對方，係值得嘅，係Enjoy嘅，但時間耐咗，就會覺得逐漸失去自己嘅主導權，變得同當初嘅自己愈來愈唔似。分手後，就可以做自己想做嘅事，唔使再下下就住另一半，可以重新搵返自己嘅快樂。

唔使再參加陌生聚會
拍拖時，好多時都會畀另一半帶去佢圈子嘅聚會。如果你個人都外向就還好，但對於內向嘅人，就會覺得勁唔自在同勁尷尬。特別係另一半咁啱行開咗，真係十萬個痛苦，呢個時候，你都只能夠微笑面對住班陌生人。

唔會再有爭執
戀愛中最辛苦一定係同另一半鬧交！有陣時明明唔係想咁講，但基於控制唔到自己情緒，都會講出口是心非嘅說話，令到大家有誤解，關係破裂。又或者講完又講，鬧完又鬧，都冇改善，不停重覆，一樣另人難受。分手或者會好唔捨得，但起碼你唔需要再糾纏喺痛苦嘅爭執當中。

同好朋友自在地約會
相信每個人為咗另一半，多多少少都試過放朋友飛機，又或者提早喺聚會中離場，更甚者，如果另一半唔鍾意你嘅朋友，你都會因為另一半嘅睇法，影響你對朋友嘅態度。恢復單身後，你就可以用最單純嘅眼光去審視朋友，同朋友玩通頂都唔使再應付另一半嘅追魂Call，又唔使下下暪住另一半玩天光，更加唔使下下同另一半報告，多咗好多同朋友嘅美好回憶。