| 喺香港過萬聖節，不外乎都係同啲朋友去下飲嘢，開下Party咁，最應該要有嘅「Trick or Treat」，即係啲小朋友敲門問你拎糖反而好少見。反過來日本過萬聖節就正宗得多，除咗啲小朋友真係會走上街問人拎糖食，有啲組織仲會喺當日派糖應節。不過今年神戶嘅小朋友就慘慘豬啦，因為當地最大組織山口組決定唔派糖啦！ | |
| |
冇錯，文青講緊嘅係「日本黑社會」山口組。大家都知日本嘅山口組其實就即係合法黑社會，不過人家除咗合法之外其實仲好關心社會，例如早年311地震會組織救援隊去災區幫手，每年嘅萬聖節亦會於神戶嘅總部外面派糖(準確啲講係「好大包糖」)比小朋友，唔知真係以為佢係慈善團體。不過近日山口組就喺自己個Twitter上面公佈，因為「諸般的事情」所以今年唔派糖！希望大家下年再黎喎！ OKOK，唔派咪唔派囉，大家都唔旨在啲糖架啦？但問題係呢個「諸般的事情」究竟有幾「諸般」呢？答案其實得一個，就係因為山口組近期搞緊分裂！ | |
| |
話說目前山口組(第六代)組長篠田建市乃係名古屋「弘道會」出身，亦係山口組第一個並非出身自關西嘅組長。佢上任之後將弘道會信奉嘅規條秩序，如保護費要登記造冊紀錄、旗下集團資金要上繳、涉足地產事業等等推廣到整個山口組，加上大力提攜名古屋派系親信，結果引起關西組織們嘅強烈反彈。同時因為近年日本警方對山口組進行整肅，令其人數由高峰期嘅4萬人銳減至少於3萬，山口組日子本身就唔好過。壓死駱駝嘅最後一根稻草就係篠田建市提出「遷都」名古屋，結果今年9月，山口組直屬73個組織中，位於關西嘅13個分會宣佈脫離山口組管轄，成立「神戶山口組」。兩派鬥爭直接導致日本各地治安不寧，於是一來為咗保障市民安全(直接啲講係「拿屎上身」)，二來相信亦冇咩心情派糖嘅山口組就決定唔搞啦！ | |
第六代山口組組長「司忍」篠田建市 | |
| 事實上唔派糖已經算係好小事。日本著名作者溝口敦近期出咗本書分析山口組分裂嘅來龍去脈，指呢個係日本暴力團史上最大嘅危機，直接影響嘅日本嘅各個社會層面，萬一兩個「山口組」真係開戰，恐怕連歌舞伎町、池袋以至六本木、銀座等山口組出沒之處都會成為危險之地。希望唔好啦，我仲想去歌舞伎町見識下架…… |
