| |
| 係係係，車上面條女係唔錯，但麻煩大家將個注意力放返落佢下面…部車到先！大家應該都記得呢部嘢係我哋之前介紹過、由前Toyota設計師根津孝太設計、「ZERO MOTORCYCLES」生產、傳說中限定49架嘅「zecOO」，亦即係所謂嘅「亞基拉電單車」。而根據Rocketnews24嘅報導，佢哋近日喺東京車展(Tokyo Motor Show)仲出咗個小改款添！ | |
比兩張圖你對比下，睇下搵唔搵得出改邊度 | |
比個小提示你，新功能係同另一間名為「TS Tech」嘅日本公司。呢間「TS Tech」主要係製造汽車座位，而且唔係普通座位咁簡單。佢哋喺東京車展展出嘅產品乃係一張可以閱讀乘客腦電波、分析佢嘅情緒同與其他乘客之間嘅關係再轉色嘅座位。你唔好問我究竟係咩原理同點解要咁做，反正你要知道嘅就係人家可以整啲好高科技嘅車櫈出黎就得啦。 至於「zecOO」嘅新功能，並唔係一張識變色嘅櫈，而係一張識變型嘅櫈。如果睇返舊相，大家會發現「zecOO」張櫈基本上就係一塊板黎。雖然睇落冇咩問題，但由於實際行走時，駕駛者個蘿友會慢慢向後跣，坐落其實就唔係好舒服。於是小改款就喺座位後面多咗個小「櫈背」方便承托你個蘿友。而最聰明嘅就係個櫈背識得根據你嘅車速調整高度，行得越快佢就升得越高，承托力就越好，真係不禁令我諗起某按摩用品牌子出嘅美臀器…… | |
留意下個椅背嘅高度 | |
| 想試下呢個新功能有幾巴閉，目前有兩個方法，一就係你依家就喺東京車展，親身去「zecOO」個攤位「試坐」；一係就付出888萬Yen，即係約57萬港紙買一架返屋企。兩樣都做唔到？咁不如真係去試下個美臀器呀？ | |
| 圖片及資料：Rocketnews24 |
