成日聽人講打機打上腦，會分唔清現實世界同遊戲世界，所以好多家長都唔畀仔女玩血腥遊戲，驚小朋友會不知不覺有暴力傾向，學遊戲世界咁，亂咁打人殺人同埋搶走人哋架車！（咦？GTA？好玩喎！）

打機會唔會搞到人精神分裂變成大壞蛋，呢層Mean娜就唔知，不過同樣作為一個鍾意打機嘅宅女，都試過打機打上腦，太過代入遊戲世界，然後喺現實生活中見到某啲情景，都覺得好似遊戲畫面，會有特別進展。舉個例子，Mean娜勁鍾意打喪屍Game，一見到疑似廢墟嘅地方，就覺得會有喪屍衝出嚟，諗起都嗨嗨！

唔知打機打上腦嘅巴打，又有冇試過呢種情況呢？日本Twitter就有網民討論呢個話題，仲Show咗好多令人「想入非非」嘅現實場景相，如果你係重度機迷，一睇啲相就會知遊戲下一步會點發展。

生命值去到紅色時，見到AED緊係要即刻拐下拐下咁去補血啦！