英格蘭足總盃第三輪終於開波，呢一輪開始英超球隊就會參戰！唔知你撐嗰隊波晉級出線，定係俾大衛踢出局呢？有留意開英格蘭低組別賽事嘅朋友都知道，因為天氣關係場波要擇日重賽係家常便飯，事關好多低組別球會個主場都無溶雪設備，冬天一落雪球場就會積雪，踢唔到波。當中都仲未計氣溫超低，大霧等等天氣問題。不過1963年有一場足總盃第三圈既比賽，比原定時間延期左足足66日先踢得成！

當時係1962/63年球季，賽事戲碼係錫菲聯主場對保頓，場波原本定左喺1963年1月5日開波，不過就延期左261次足足兩個月先開到波，而原因全部都係氣候問題，例如球場有15英尺積雪、烈風、凍霧、球場結霜、氣溫跌至零下20.6度等等。而1月5日當日，就只有三場足總盃賽事係唔需要延期同順利完成。至於鍚菲聯場波呢，佢哋最後就以3-1贏左保頓出線。

賽事延期，主場嘅球會梗係牙痛咁聲啦，因為全日嘅門票收入就咁就無左，仲要處理埋好似積雪嗰啲天氣帶嚟嘅手尾，都要使錢架嘛。而財政麻麻嘅球會就要同英格蘭足總借錢，好似黑池係同一個球季時12月中到3月有足足三個月無打過主場比賽，嚴重影響球隊收入搞到英格蘭足總要免息貸款俾黑池江湖救急添呀。

賽事延期，究竟邊個最開心？答案就係賭仔最開心。原來以前英國既博彩公司都會將賽事延期當成和波看待，所以好多賭仔就會喺呢啲日子賭身家買和波，人數仲以數百萬計，搞到有唔少博彩公司都瀕臨破產邊緣。不過我就代表MenClub奉勸一眾巴打，足總盃就忍下手唔好賭，係人都知足總盃係爆冷溫床，陣間搞到無錢過年就唔係咁好啦。