文：李羅渣　圖：互聯網

各位Gentlemen你哋好，我係李羅渣，今日開始逢星期三、五我都會喺MenClub同大家講下足球，其實電影呀，酒呀、飲飲食食、衣著呀之類我都識講下，希望不久嘅將來我會有機會同大家講波之餘，仲可以分享下其他興趣，一齊be a better man啦！

唔浪費時間，即入正題！第一次見面不如就講吓賽前預測。1月25日星期一淩晨12點（即係星期日晚啦）英超就有場倫敦打比，阿仙奴對車路士！今屆英超都算相當有驚喜，邊個會諗到呢個戲碼由以往英超前列對碰變成爭冠球隊對護級份子，而阿仙奴球迷又邊會估到今年終於有機會爭吓英超冠軍（雖然未到二月唔知係咪最後要爭四），更估唔到係其中一個爭冠對手竟然係李斯特城。阿仙奴對上兩場都係和波收場，夾埋已經唔見左四分，要不是上星期阿士東維拉迫和李斯特城，阿仙奴個榜首早就完蛋鳥。

阿仙奴今場嘅好消息，就係雲加話上場對史篤城時因為輕傷無上陣嘅奧斯爾，對車仔可以上陣架啦！呢個唔夠一季已經交左16個助攻嘅德國中場應該可以幫到唔少手，麻煩就麻煩在幾個主力好似高基連、阿歷斯山齊士、辛迪卡蘇拿都未知出唔出到場。始終車路士爛船都有三斤釘，有幾個主力幫手點都係好事。不過祖爾甘保、禾確特呢啲比較二線嘅球員表現都唔錯，對上幾場波都交到功課，至於死神藍斯，well...大家有睇吓近期新聞都知佢又有波入喇，防守仲未計今場倒戈嘅門神施治，肯肯定會大打爭氣波。

至於車路士，今季由天堂跌落地獄仲衰過曼聯由莫耶斯帶嗰時，點解搞成咁，到今日都係一個謎！你話因為球員唔妥摩連奴咩？而家摩佬都走左啦，係呀，而家無輸波啦，但由摩佬被炒嗰日計，都只有3勝4和嘅成績，而其中一場勝仗對手仲要係甲組嘅斯肯索普，所以佢地個不敗紀錄都有少少水份。至於球員狀態，喺曼聯手上爭返嚟嘅柏度表現未如理想，到而家都係得兩入球兩助攻；夏薩特就講嚟都多餘，入咗波先講野啦，都未講條友個心可能已經去左皇馬；係嘅，法比加斯同迪阿高哥斯達上場對愛華頓表現唔錯，但對住戰意高昂，等分守住個榜首，近況又唔錯嘅阿仙奴可唔可以打返呢個水準呢？又另一件事囉。

車路士今季實際上已經完咗，你話佢地會降班？認真又唔會嘅，不過你話上前四啦喎，真係俾你餘下比賽全勝都好似窄窄地，唯有就係之後啲比賽打得好啲，唔好咁難睇，加上希丁克都係教半年，呢個月相信都唔會點買人；再者車仔今季英超作客先贏得兩場，又加上今季阿仙奴主場戰績都好穩定，小勝一兩球應該OK嘅。車路士想偷雞又唔係話唔得，如果針對返阿仙奴高基連缺陣令到中場對碰性下降個問題，用拉美利斯搭馬迪或者米基爾，攻中出返法比加斯，收起夏薩特用柏度（無人好用無法啦），都有一線生機。點之一句講晒，我今場一定睇好阿仙奴，可以報到上一輪作客輸0-2嘅仇。

小弟喺MenClub第一篇文，希望大家可以支持下啦，啱睇就唔好吝嗇你嘅like and share，更下好嘅就係喺MenClub嘅page留comment，我都會睇到你哋意見，等我可以做好啲，你哋be a better man，我就be a better writer呀嘛！星期三再會！

李羅渣

八十後、14年曼聯球迷、3年愛華頓球迷、演員、網台主持。

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。