Cosplay就見人玩得多喇，咁點先算神Cosplay呢？神似嘅Cosplay唔一定要勁靚，但還原度同像真度一定要勁高，裡裡外外表現出動漫人物嘅神緒。最近日本就有位伊藤潤二超級Fans いくら喺Twitter上分享咗佢嘅Cosplay照片，每個角色像真度都極高！話係神Cosplay絕對冇人異議！不過計Mean娜話齋，佢嘅Cosplay唔只神似，正確而言應該係「好鬼神似」！皆因佢Cos嘅咪就係伊藤潤二筆下最紅嘅女鬼富江囉！

伊藤潤二係日本著名恐怖漫畫家，佢嘅漫畫總會營造出恐怖嘅壓迫感，加上獨特嘅畫風令人一睇就不寒而慄，堪稱漫畫嘅大師。而いくら( @mamakiteru)就深深迷上伊藤潤二嘅作品，更喺自己嘅簡介入面話，希望住喺伊藤老師嘅世界入面......認真重口味。

不過いくら嘅Cosplay手法同其他人唔同，唔單只透過服妝、化妝、髮型等等改變去成為動漫人物，仲運用埋彩繪藝術，令佢嘅Cosplay更貼近漫畫風格。

就好似咁樣將陰影畫喺面上，嗰種漫畫味道隔住個mon都聞到。

いくら非常喜歡伊藤潤二嘅畫風，所以佢嘅Cosplay都會將自己畫到同漫畫人物一樣。除咗《富江》系列，いくら仲會Cosplay伊藤潤二其他作品嘅人物，例如《溶解教室》、《壞小孩》等等，甚至伊藤潤二嘅插畫同展覽作品，佢都唔會放過，果然係超級Fans。