用美容產品 好多男士一邊歧視人敷mask,一邊妒忌人靚仔,除非本身天生麗質,如果唔係靚樣都係要用心經營。試問男人可以對女人嘅外表評頭品足,點解女人唔可以倒返轉?你嫌人哋鼻唔夠高、眼唔夠大嘅時候,條女可能一樣嫌你皮膚太粗、暗瘡太多。所以今時今日扮靚無分男女,用洗面產品、敷面膜、搽cream呢啲都不過係正常嘅保養皮膚程序,人人都需要做,跟本冇話乸唔乸,甚至男士化妝又如何?都一樣好man,你估電視見到嘅man爆男神真係素顏上鏡架?黑眼圈都會遮下啦,令自己好睇啲,有幾難為情啫!
喊 成日話「男人流血不流淚」,除非你天生就冇淚腺或者冇感情,如果唔係一定會有令你想喊嘅moment。好多男人自以為係女人先會喊,所以喊就等同軟弱,但你有冇諗過點解你會覺得女人喊就係軟弱先?因為啲女成日有事冇事都喊,話佢兩句又喊,大聲少少又喊,肥左兩磅又喊,指甲崩咗又喊,其實呢啲真係唔太值得喊,女人自己都知架,不過女人同時心裡好清楚,眼淚就係佢地最大武器,一喊就有人氹,先會濫用眼淚呢一招,令男人有種錯覺,喊=weak。但其實喊只係抒發感情嘅正常渠道,作為一個正常人,喊係冇問題,唔好覺得自己一個大男人喊就好失威,你唔識喊先有問題呀。
表現熱情 好多男士都覺得,作為男人,一定要夠Cool,事事冷漠先係man嘅典範。咩年代呀...今時今日你仲行呢一套,啲人並唔會覺得你特別man,只會覺得你係個怪人,好難相處。唔好覺得事事關心,表現熱情就好婆媽好女人,對喜歡嘅事物充滿passion係好正常嘅事,當你全心投入時,發出嘅光芒反而仲吸引人,令人覺得你仲man。
鍾意「小」動物 男人最鍾意大,波大、丁大、養隻狗都要大隻過人先覺得襯返佢咁man!可能體型比較小嘅動物感覺較cute,而體型比較大嘅動物感覺較型,所以好多男士都唔敢表示自己係鍾意細細粒嘅小動物,怕畀人話好乸唔襯男人,驚畀人話︰「男人之家鍾意隻倉鼠」。不過無論大嘅動物定細嘅動物,動物本身就有佢哋嘅可愛之處,都係嗰句,你養隻芝娃娃唔會令人覺得你冇咁man囉。如果講到男人一定要同大嘅嘢有關聯先夠man,咁...相信大把男人其實都唔係好man...(你懂的)
鍾意甜食 成日話「男人要吃得苦」,講嘅係叫你要捱得唔係唔可以掂甜嘢囉,如果唔係你唔好走去餐餐食苦瓜飲涼茶?口味嘅嘢本來就人人都唔同,有人鍾意咸、有人鍾意甜、有人鍾意酸、有人鍾意辣,咪咁小學雞話人食得咸個人就咸濕先得架,你嘅口味並唔代表你個人,更何況食完落肚痾返出嚟都係一樣,你想食咩咪食咩,你慌人哋真係會留意你叫士多啤梨新地咩?唔會架~諗多咗喇你。 |