作者：李羅渣

圖片：Telegraph.co.uk

英超曼聯又輸一場，又要有請馮堅成。上星期六曼聯作客以２－１輸俾新特蘭。雲高爾上年年尾仲牙貶貶話要拎聯賽冠軍，諗返起都想笑。加埋情人節前四大戰過後，而家仲要落後第四位嘅曼城６分，而家得返１２場聯賽，曼聯如果下季仲想有歐聯打，一定要打醒十二分精神，下場聯賽仲要打阿仙奴呀。

圖片：manutd.com

其實曼聯嘅表現，隨住連加特因為表現突出成功爭取右翼位置，再推馬達去佢最擅長的攻中位置，令到曼聯中前場活力大增，不過後防最大件事就係有嚴重傷兵問題，星期六輸俾新特蘭後連達米安都傷埋，根據雲高爾講法，而家曼聯已經無右閘球員，好就好在曼聯嚟緊兩場比賽對手係歐霸盃嘅丹麥球隊米迪蘭特同埋２月２２日足總盃對甲組仔梳士貝利，要諗對策都仲係有時間，過咗呢日就有烏拉圭年青右閘華利拿復出。

圖片：Thesun.co.uk

講返聯賽，１２月一場不勝絕對係曼聯搞成咁嘅關鍵，而曼聯仲有好多強隊都仲未打，除咗月底打阿仙奴，仲有未打嘅勁敵就係曼城、愛華頓、熱刺、李斯特城都未打，都未計水晶宮或者韋斯咸呢啲豬頭骨，而家嘅曼聯輸俾任何球隊都唔出奇，淨係講賽程，曼聯係咪真係有本事贏到呢啲對手都好難講。

圖片：manchestereveningnews.co.uk

傷兵又多，賽程又唔易打，又無放棄某啲比賽，都唔知點樣可以前四。雲高爾上季季尾就話曼聯可以拎到聯賽冠軍，但而家曼聯又排第五，差榜首李斯特城１２分，老老實實都好難，方丈而家又話前四好難喎，要下季有歐聯打就要贏尋霸盃，嘩！點解可以咁快轉呔嘅？早兩日連前曼聯領隊莫耶斯仲警告話，如果曼聯最後無前四，雲高爾就要俾人炒，睇路啦方丈，椰子除咗無辜之外，講呢句嘢都係非常之有權威架。

李羅渣

八十後、１４年曼聯球迷、３年愛華頓球迷、演員、網台主持，真‧偽文青

鍾意睇戲睇書，又鍾意打泰拳，亦鍾意飲飲食食，特別係紅酒同打邊爐

總之動靜皆宜，又乜都想試，係一隻合成獸。