一隻靚錶嘅吸引程度絕對係better than sex，唔信? 大家不妨欣賞吓 Cartier 新出嘅天體運轉式陀飛輪，機芯好似玩魔術咁懸浮於錶殼之中，而發條盒、擒縱器又好似無同錶冠相連，使到上鏈、較時間嘅方法都有別於傳統。呢隻 Rotonde de Cartier Astromystérieux 果然係愈睇愈 sexy……

既然叫得做陀飛輪，Rotonde de Cartier Astromystérieux 嘅運作原理其實同傳統分別不大，旋轉框架嘅動力同樣來自與發條盒相連嘅固定齒輪。唔同嘅係，核心結構由擒縱器、平衡擺輪，齒輪組和發條盒組成，以中心為軸，每小時運轉一圈。

三層藍寶石水晶圓盤作為橋板，最下層嘅部份負責為陀飛輪框架提供動力，當錶冠被拉出嘅時候，槓桿會固定分鐘齒輪軸嘅陀飛輪框架，本身被鎖住嘅底層將得以釋放，演變成一個調校時間嘅模式，呢項咁勁嘅設計已經申請咗專利。

同樣有專利嘅，當然係佢既上鍊系統。工匠重新設計錶冠柄軸同上鍊圓盤之間嘅懸浮齒輪，當錶冠轉動嗰陣，呢粒齒輪會移動連接上鍊圓盤；靜止個陣就會自動卸出，分開兩者。呢一種離合系統，能夠確保錶冠軸、發條盒響過度上鍊嘅時候唔會受損，極之厲害。