|
近兩年，好多人一聽到盧海鵬，就即刻講「盧海鵬試咪」，但究竟有幾多人知背後嘅故事？其實呢件事發生喺《歡樂今宵》年代，正如所有錄影一樣，rolling 之前都會要求所有演員試一試咪，確保直播節目無差錯，而一般人都只係會戴好咪，然後講句：「喂喂？Testing testing......」，不過百厭嘅鵬哥某次試咪時，就自動波一展其《蝦仔爹哋》押韻風範，然後話：「盧海鵬試咪，屌你老母西，得唔得？！」呢句說話除了粗鄙，惹笑之外，其實最勁係最尾嗰句「得唔得？」，因為如果試音師話「得」，那鵬哥就會問：「真係得？咁我嚟啦喎。」，意即試音師答應讓鵬哥問候其娘親；但若果答案係「唔得」的話，那麼鵬哥只會繼續 X 人老母 X，直到 okay 為止。 老實說，電視台鏡頭背後，大把人講粗口，再加上呢個係盧海鵬，原本根本唔係一回事；不過早幾年，黃偉文就喺自己專欄分享咗呢件事，結果大受歡迎，連亞視嘅節目 promo 都用咗呢句嘢嚟做宣傳。久而久之，就成為咗潮語，而家大家有時甚至會用「盧海鵬試咪」嚟直接取代「 X 你老母 X」。 好可惜，自從呢句嘢發揚光大之後，盧海鵬都好少會用粗口嚟玩「盧海鵬試咪」，直到最近 MenClub blogger 緬甸晶宮，為咗拍攝佢哋同尹光嘅新歌，竟然搵到盧海鵬客串，teaser 中，只見鵬哥戴咗假髮，着上東邦球衣，未知係咪扮演《足球小將》嘅小志強，只見當被要求「盧海鵬試咪」時，鵬哥竟然唔跟稿，爆肚......？ 點都好，睇嚟呢個 MV 有尹光同盧海鵬，都幾值得期待，請大家密切留意 MenClub 嘅第一手 update！ |
