Bell & Ross 之前宣佈正式成為雷諾車隊 (Renault Sport Formula One Team) 嘅腕錶夥伴，隨之而來係兩隻新作 : BR-X1 RS16鏤空計時錶、BR-X1 RS16鏤空陀飛輪計時錶。BR-X1作為經典 BR01系列嘅變奏版，加強咗對機械工程、精準性能同速度理念嘅追求。

(左至右) 雷諾一級方程式車隊車手 Jolyon Palmer、Kevin Magnussen、
Bell & Ross全球銷售總監Fabien de Nonancourt

兩隻同樣擁有45mm錶殼，以5級鈦金屬加高科技鍛造碳 (Carbone Forge) 精製，輕巧、堅固、擁有極佳抗震能力，對於賽車呢項運動，呢啲特質都係必要嘅。

鍛造碳物料係由專利技術加工而成，原理係將碳纖維同熱固樹脂置入鋼模之中，以高溫加高壓鍛造。錶殼一體成形，表面平滑無孔，有防水特性，無規則混合碳纖維物料造成雲石紋理，啞面柔滑觸感，有助減少反光以避免影響閱讀時間。

BR-X1 RS16鏤空計時腕錶，限量250隻。淺灰色水晶玻璃錶盤，飾有夜光時標，透視機芯結構。陶瓷製造、鑲以黃色橡膠嘅搖桿式計時按鈕，藉以操控計時程序；錶盤邊緣深灰色斜面有測速計刻度配合計算車速。配備BR-CAL.313自動上鍊機芯，黑色PVD不鏽鋼針扣，橡膠或碳纖維編織錶帶。

BR-X1 RS16 鏤空陀飛輪計時腕錶，限量20隻。BR-CAL.283手動上鍊飛行陀飛輪單按柱輪計時機芯，提供4日左右嘅動力儲存，錶盤9 點位有100小時動力儲存顯示，2點位60科計時盤，10點位則為30分鐘計時盤，下方6點就係鏤空陀飛輪架構。