Blue Monday照計應該要同大家講啲醒神話題打打氣，做乜係都要講助眠飲料咁掃興，貪家下未夠眼瞓咩……等等先～兄台，覺唔覺星期一總會特別眼瞓？覺唔覺前一晚總係瞓得特別差？覺唔覺瞓瞓吓總係醒一醒偷望仲有幾多時間瞓？之所以有Blue Monday呢個term，就係因為星期一係每週公眾假期（星期日）過後嘅第一個工作天，大家都要收拾假日嘅愉快心情，重新面對工作，所以唔少人星期日晚就開始感到壓力，結果就搞到瞓得差甚至係失眠。

「唓～眼瞓有幾閒丫，隊多兩杯咖啡就冇事啦！大不了咪隊埋Red Bull囉！」傻豬嚟嘅，與其谷到自己精神狀態咁繃緊，不如放棄紅牛，試吓由根本改善，學習放鬆飲吓「慢牛」啦。

呢隻「慢牛」（Slow Cow）係最近韓國網友間熱推嘅助眠飲品，雖然Slow Cow係最近先喺韓國興起，但其實佢係2008年由加拿大出產嘅碳酸飲品，一款係含有有助睡眠嘅「纈草根」萃取物，幫助放鬆；另一款係含有安定神經嘅「茶氨酸」（L-theanine），幫助安神。值到2014年，Slow Cow先開始喺韓國販賣，最近仲喺IG掀起#slowcow#슬로우카우嘅熱潮，唔少網友都封佢為失眠救星！

Slow Cow主打8種草本成分，其中包括︰左旋茶氨酸、黃春菊萃取物等等，其作用主要用以鎮定神經、放鬆精神，免除長期服用安眠藥嘅負作用。 

不過話就話係失眠救星，但成效係點相信都因人而異，平日冇留意，巴打知唔知香港有冇Slow Cow賣？