自古以來，空姐畀人嘅印象都係好似女神一樣，高貴、優雅、美麗、大方，再加啲性感同知性添，想當年冇返咁上下條件，都好難做到空姐。雖然今時今日好多人都覺得空姐質素每況愈下，衰啲講句，好似「阿豬阿狗」都可以做到空姐，但不少人依然對空姐充滿ff，視空姐為夢寐以求嘅對象，就算知道大家好難夾到時間見、少機會溝通、容易引狗公等等，都希望一生人可以食到一次空姐，咁真係短幾年命都抵……

嗱嗱嗱，如果你真係甘心為此短幾年命咁有吉屎，就成全你嘅夢想，等搭訕達人教路，喺機上媾空姐有咩技巧，等你唔好白白浪費飛行中幾個小時嘅黃金時間，不過Mean娜睇完啲方法，覺得你落Club yo中個空姐，成功率似乎仲高N咁多倍...Any肥，睇咗冇壞嘅，可能機緣巧合下，真係畀你用得著呢！

1.有紳士風度
睇新聞都知道，好多人畀個錢搭飛機就覺得自己係大爺咁，對空姐呼呼喝喝之餘仲毛手毛腳。即係咁，有錢係大，不過唔係大L晒，除非個空姐膚淺到為錢出賣自己，如果唔係人格衰點都唔會媾到女。其中一個媾到空姐嘅「成功人士」就同大家分享，有次佢身邊嘅乘客當自己大少咁，向空姐發老脾，搞到機長都要出嚟沙冧，不過呢個「成功人士」當下就為空姐同機長著想，為佢哋講好說話幫拖，結果個機長就不停感激佢，話佢好好人，仲介紹一班空姐過佢識，跟住再空姐介紹空姐、空姐介紹空姐……好人真係有好報架！

2.善用位置
如果你個位唔就腳咁冇辦法，但如果你嘅座位喺空姐附近，不妨趁空檔時多啲同空姐吹下水，爭取機會加深印象同得到聯絡方法。

3.避免繁忙時間打擾空姐
雖則啱啱先叫你要把握時機，多啲同空姐傾偈，不過唔係叫你下下都要撩空姐，話晒人哋都係返緊工，邊可以咁得閒一直同你吹水丫，見到佢哋準備餐飲同忙碌緊嘅時候，就收下把口，唔好煩住人，如果唔係咩好印象都冇晒，等到佢哋做完嘢，慢慢再傾過啦。

4.唔好講無聊無趣話題
空姐成日都周圍去，見識都多過人，而且成日都畀人搭訕，嚟嚟去去都係被問︰「你鍾意飛邊呀？」、「你今次stay幾耐呀？」、「你慣唔慣時差呀？」等等，真係答到識得背，開頭已經咁冇癮，仲邊有興趣繼續傾？有「成功人士」（係呀，成功機上媾到空姐人士）就分享，當初同空姐講自己去不丹旅遊嘅經驗，由於呢個地方好少人去，所以引起空姐興趣，繼而拎到空姐電話。

5.經常搭同一航空公司嘅班機
老老竇竇，三唔識七就畀電話你真係有難度，想增加搭訕成功嘅機率，最好就由生變熟，起碼你都要成日搭同一間航空公司嘅班機，多啲製造再次相遇嘅機會，想要電話就易好多！不過呢個可能只有經常去同一地方公幹嘅人先做到。

6.做VIP
呢個point比上一個point更難達標，就係要成為航空公司嘅VIP。根據規定，空姐一定要同VIP會員打招呼，跟住就乘勝追擊繼續傾，咁就唔會好似冇啦啦搭訕咁odd咁尷尬。不過首先你要有好多錢做VIP……