有冇諗過點解洗頭水廣告入面啲女Model嘅頭髮永遠都咁飄逸？你可能會諗到用風扇吹，又或者成把頭髮根本就係假嘢，全部由電腦動畫造出嚟。

近日係twitter就有人爆料，話其實仲有第三種方法，就係搵個專業嘅「揈揈（音:Fing Fing）員」著住由頭綠到落腳嘅緊身衣，喺特技背景前面起勢幫個Model揈起啲頭髮，事後再用CG執走個綠衣人！

計我話，呢份工最惡搞，唔係在於工作本身，而係點同人解釋你究竟撈緊咩──「Hi Auntie，我叫阿強，喺廣告公司做製作，主要幫人揈嘢！」

比著我見到自己著成咁，係個綠布景前面係揈條女啲頭髮，都不其然會停一停，諗一諗，自己究竟喺到做緊乜……

Think positive，呢份工前景應該唔錯！始終行頭窄，競爭少，需求又大，如果揈頭髮揈得Pro，分分鐘可以轉去揈超人件袍！到時Auntie可能會改觀呢！