| 如果有人同你講佢住緊一個200尺嘅單位，你腦諗緊個畫面一定係相當逼夾。第一係因為大家都知，喺香港嘅200尺樓，其實唔係200尺。第二就係設計、擺位其實都對空間感有好大影響。好似呢間外國公司設計嘅「The Alpha Tiny Home」咁，就用設計搭救空間不足嘅問題啦。 | |
| |
| 由「New Frontier」設計嘅「The Alpha Tiny Home」建於一架24尺拖車之上，總面積大約為200平方尺。麻雀雖小五臟俱全，廚房廁所浴室睡房有齊呢啲就梗架啦，但最正嘅都係利用設計為間屋增添空間感。例如間屋正中(即起居室位置)有一度落地玻璃門方便採光，另一面平時係木牆，但有需要嘅時候可以打開成為露台。屋嘅兩邊就分別係一個有灶有鋅盤有雪櫃嘅廚房，另一邊就有座廁有浴缸有洗衣機嘅浴室，浴室上面就係閣樓睡房，雖然坐唔直個人，但都係雙人床。最驚人嘅就係嗰張平時收埋，但開到盡可以坐八個人嘅飯檯！邊個話200尺樓唔可以叫朋友黎架？ | |
| |
| 除咗24尺之外，New Frontier仲有設計18至40尺長嘅版本，實際面積大概係120至250尺。而且仲可以加裝太陽能、有焚化功能嘅座廁等等環保技術。最重要係售價(上圖嘅示範單位)大約為95000美金，即係七十令萬港紙。平就稱唔上嘅啦，但對比起香港同類嘅單位，你又會好葡萄咁囉！
| |
| new frontier tiny homes |
