鮮紅色：活力、性感、搶Fo

紅色的跑車像是帶著神秘，而除咗神秘，Eiseman就話揀紅色車嘅人通常都非常有活力，亦有(自以為)性感嘅含義。但最重要嘅係佢一定係一個鍾意搶奪大家注意力嘅人。不過因應唔同嘅「紅」，表示嘅嘢又有少少唔同。

暗紅：繼續搶Fo、但低調啲

揀暗紅嘅人同揀大紅嘅人一樣，基本上都係想大家將注意力放喺自己身上，但對比起揀大紅嘅人，揀暗紅嘅相對地又會低調啲，而且感覺上亦會老練啲。

橙：友善、潮流、變幻無常

同樣屬於亮色系嘅橙色，同紅色一樣都有搶人注意力嘅含對義。但因為橙色唔常見，會揀橙色亦代表佢份人比較「潮」。另一邊廂，橙色亦都冇紅色嘅侵略性，所以感覺上會比較友善。另外大家都諗到，會揀架橙色車嘅人，隻色(甚至架車)都唔會用得耐，所以又會畀人「五時花六時變」嘅感覺。

鮮黃：開心、友善

我直接引用Eiseman嘅說話：「因為佢好顯眼，所以安全啲」。另外因為佢係陽光嘅顏色，所以睇到嘅人亦會比較開心，感覺友善。

深黃或金：友善但老練

同「大紅與暗紅」一樣，深黃對比起鮮黃亦係多咗份老練，尤其如果係用上金色，就更加係暗示緊架車嘅價值(至少係你想人哋覺得係嘅價值)。所以深黃或金仍然係友善，但就冇咗份童真咁。

深綠：傳統、平衡、低調

你睇到相都知深綠有幾悶，實際上佢代表嘅亦係傳統、穩重。加上因為綠色同環保有關，所以感覺上又會自然啲，亦有一個非常正面嘅含義。

鮮綠：有趣、活力、潮

鮮綠就唔同啦，佢代表嘅係有趣、搞怪、有活力，而且同橙色一樣係潮嘅顏色。同樣道理，亦因為感覺上你唔會擁有呢架車過世，所以感覺都會有啲花心。

藍：可靠、冷靜

藍色不嬲都係世界通用嘅熱門顏色，而正因為佢咁熱門你都揀，就代表你個係可靠、冷靜、有信用嘅人。而且通常都比夠靜，唔會講誇大嘅說話，友善，但又唔係毫無保留嘅友善。

紫：有創意、獨特、個人主義

有冇見過紫色嘅車？有，不過極少。所以會揀架紫色車嘅人唔單止好有創意，仲係一個頗為我行我素嘅人。

灰：合作、務實

另一隻非常大路而且非常悶嘅顏色，會揀嘅人通常都係貪佢襟睇，可以長揸(架車)，所以亦係一啲非常清醒同務實嘅人。

白：乾淨、挑剔、怕熱

白色當然就代表乾淨，但同一個意思就即係「易污糟」。換言之會揀白色車嘅人已經預咗自己要比其他人花更多時間打理架車，所以就係「挑剔」啦！另外一個最現實嘅理由就係白色冇咁吸熱，所以係熱帶、亞熱帶地區(即係香港)，唔少人都會因為天氣問題而揀白色。

黑：權力、地位

最經典嘅顏色，亦係長轎車、政府官員、黑幫首領等等位高權重嘅人會用嘅顏色，所以黑色就代表權力與地位。咁會揀黑色車嘅你當然就係想表達呢兩樣嘢啦。

銀：高貴、未來感

非常直感嘅一隻顏色。除咗代表高貴，亦因為唔知點解大部份對於未來嘅幻想都係以銀色為主，所以亦帶有未來感。