我愛你，我愛你，我愛你，我愛你，喺呢個人人都輕易說「愛」嘅時代，有幾多人會懂得道出一句「珍惜你」呢？「愛」可以好單向，用自己方式去投入感情，也許包含控制、猜度、無理取鬧，然後一句︰「我太愛你所以先咁咋！」結果因為愛，而迫使對方受盡壓力離開。但其實真正愛人，理應尊重對方，包容對方，互相體諒，互相遷就，先可以走得長遠。喺「520」背後，學師兄劉浩龍話齋，更重要係「珍惜」二字。 | |
師兄新歌《520》，單睇歌名以為又係Sweet爆冧歌，但細心留意歌詞，其實《520》係一首呼籲大家好好珍惜另一半嘅情歌。「我好深刻兩年前左右，幫一位好朋友做結婚兄弟，播《Canon in d》嘅時候，仲播埋兄弟同太太跳舞嘅片段，但今年年頭，佢太太病咗，於是我好想送一份禮物鼓勵佢，叫火火填詞，又拍咗音樂電影，希望帶出同人相處，最重要係珍惜、享受嗰個Moment，就算唔喺你身邊都好……」
拍過三次拖，而家第四段感情，師兄表示愛情路上，暫時都冇咩遺憾，同三位舊愛依然好好朋友。「我覺得自己處理得唔錯，所以真係冇咩大嘅遺憾。」咪睇師兄大大隻咁豪邁，實係鍾意小女人，查實師兄由細到大都鍾意運動型女生，因為佢自己都好好動，所以希望伴侶可以同佢一齊做下Exercise，又唔使下下好女仔要人照顧。呢種類型嘅女仔畀人感覺都好爽朗，好識Take Care自己，唔會黐身黐勢過分小鳥依人，但師兄就冇因此忽略對方，反而Keep住乜都講又下下報告，為嘅就係讓對方感受滿滿嘅安全感。「我其實覺得，女性係需要安全感，你可以不斷話佢聽你做緊啲咩。可能好多人唔會咁做，但我會。」 | |
| |
| |
| |
除咗事事報告，令對方放心，師兄亦認為，戀愛相處之道一定要融洽。「我唔覺得嗌交係幫到嘅，我大個之後從來都唔會做呢件事，我會去溝通。」聽落好似好成熟，但其實師兄曾經都幼稚過。「初戀時我比較容易呷醋，嗰時得十五歲……係小器啲嘅……咩都嬲得嘅……我記得細個嬲過黎明，因為我初戀女朋友好鍾意黎明，跟住我有一次好嬲，掟咗佢隻黑膠唱片落街lol……呢個係好低能嘅我。」不過隨住人愈大，經歷愈多，亦愈來愈成熟，更懂得從伴侶身上學會處事冷靜啲，先令佢今時今日嘅愛情，能好好去溝通與包容，「我相信我而家係幾成熟嘅男士。」 縱然成熟，面對流言蜚語未必人人忍得到，特別公眾入物拍拖，大多都會遭受外人指指點點、比呢樣比嗰樣，相信師兄亦受唔少，但師兄就滿不在乎︰「我覺得而家個世界係咁架，好多時都會比較每件事，我覺得愛情係兩個人嘅事，外人講嘅嘢唔需要理會，我覺得通常批評你嘅人，都唔係你嘅朋友，咁如果你對啲唔認識你或者唔係朋友嘅人，都咁在乎，咁做人非常辛苦。」師兄仲話，會成日自己提自己同朋友，最重要自己知自己係點，屋企人知你係點，朋友知你係點，咁就ok，冇可能全世界都話你係好。」 | |
 | |
| |
| |
Credits: |
