從後台工作變成Model、再從Model走入演藝界，本月喺《點五步》擔正做女主角，談善言(Hedwig) 幾年間嘅發展可以話由佢一頭嘅短髮開始。有人話Carry到短髮嘅女生先係真正嘅靚女，因為面形、輪廓嘅嘢無得呃人，我最印象深刻嘅例子係日版《花樣少年少女》，當堀北真希個角色換成前田敦子出演，靚唔靚真係高下立見。 |
|
與市場上眾多走可愛路線嘅女生不同，談談嘅短髮Look好多時令佢更具英氣。喺訪問入面佢直言自己由細到大都係男仔頭、好鬼惡，俾著一般女仔行呢個路線，晨早收檔啦，但美女就是傲驕、就是任性、就是有特權，可以將自己嘅風格貫徹始終，但同時又有咁多人鐘意。 |
|
「試過有一次，班房有男仔圍住咗個女仔話要幫佢度3圍，我記得我係一嘢拍落張枱度，然後話『你做咩呀?』，跟住嗰個男仔就走咗。我中學嗰陣好惡，啲女Miss都話有咩發生都唔會係我，因為我太惡啦!」 |
|
「可能因為咁我中學年代都處於一個比較強勢嘅位置，但大個咗就唔係咁，個人變得好慢熱同好內斂。」Hedwig由細到大都男仔頭，不過百煉鋼亦有繞指柔嘅時候 : 「我覺得自己喊嘅時候最女性化，因為喊嗰陣最表現到一個人最柔弱嘅一面，呢個時候嘅我應該係最女性化，或者可能係最小朋友化。不過我喺電影入面嘅喊戲都比較偏向傷感，而非火爆或者激動。」 |
|
男仔頭嘅個性，有時會變成自己嘅枷鎖同壓抑，「其實我好唔鐘意喺人地面前喊，因為我唔想俾人見到我懦弱嘅一面，但我好多時都愈掩飾愈露底囉，就會俾人覺得『唉，佢一定係好無自信』或者『佢一定係好蛇驚』咁囉。」 |
|
《點五步》，一套港產熱血棒球電影，呢度唔劇透太多，但可以話俾大家知，愛情線佔嘅比例非常少，而僅有嘅情情塔塔嘢，就係發生喺女主角談善言同男主角胡子彤身上。「我會比較多情緒起伏較大嘅場面，所以心理壓力會來自演出時嘅情緒，另外今次亦都係第一次有親熱戲，即不是話好激烈，只係好蜻蜓點水，好學生式嘅親熱戲，但因為都係我第一次喺螢幕上有初吻，所以嗰陣時都好緊張。」雖然談談將呢場戲輕描淡寫地帶過，但呢段親熱戲就係電影嘅第一個高潮位，觀眾可以密切期待。 |
|
|
獨立、堅強，彷彿係談善言自身散發嘅魅力，同電影入面嘅角色一樣，當有任何問題發生，Hedwig都會揀靠自己解決，「我地都會處理好自己嘅事，唔想麻煩到其他人。我個角色喺電影入面都有件大事發生咗，但佢無靠其他人，自己處理咗，我覺得我都有呢個成份。」 |
|
新人入行，備受批評係難免的，對於談談嚟講，坊間一切意見佢都可以虛心受教，人生中最受傷嘅評語，竟然係來自朋友一句嘅「好人你做哂啦」。「其實我睇咗一段時間嘅動漫，或者睇戲又好，我成日覺得你喺第三身嘅角度去睇件事，你會見到大家各自都有大家嘅理由，但因為一句說話 miss 咗或者無表達，成件事就扭曲哂。」 |
|
「咁我成日都俾人話手指拗出唔拗入，啲朋友同我訴苦嗰陣都話『你唔好成日幫人講說話啦，我係你friend嚟架，你係咪應該幫我呀』，最尾就演變成『好人你做哂啦，乜都你講哂啦』，我覺得呢句說話最傷，因為如果作為一個朋友，你應該知道我係點樣去睇、去諗一件事，唔係所謂嘅手指拗出唔拗入，而我覺得呢個係朋友嘅背叛囉。」 後記 : |
Credits: |
