圖片：Dailymail | |
星期日英格蘭社區盾曼聯以2-1贏到李斯特城捧盃後，就象徵英格蘭嘅球季正式開始。呢場波大家都掛住講曼聯，一來曼聯開波前就公佈普巴已經得到祖雲達斯許可去曼聯做體測，睇怕回家都係呢幾日嘅事，二來大家都想睇摩連奴嘅曼聯有乜引人入聖之處。但我反而都好想知道李斯特城呢季到底會正式成為強隊定係打回原型，完咗呢場波，相信球迷們都會覺得狐狸就算衛冕失敗，但仍然有一定戰鬥力，即使雲尼亞里喺賽後記者會話李斯特城今季目標仍然係40分。 | |
圖片：Metro.co.uk | |
李斯特城常用戰術都係4-4-2，呢種陣式基本上喺英格蘭已經係舊時代產物，只有中下游或者低組別球隊先用。而且雲尼亞里都打破咗近年爭取控球有利比賽嘅迷思，用速度同善用反擊得到唔少分數，呢套戰術可以古老當時興，今季轉投車路士嘅防守中場簡迪一定係最大功勞，佢嘅走動同工作補足咗中場人數對比4-2-3-1或者4-1-4-1嘅不足。今場波用真禾特同安迪京治打中場，中場硬度同上季比就已經爭咗截。 | |
圖片：Lcfc.com | |
而李斯特城今場波仍然可以同曼聯爭一日長短，係因為曼聯條中場仍然好慢，下半場雲尼亞里放今季加盟嘅格雷同梅沙用速度壓倒曼聯，做法相當聰明。對於兩閘老化嘅球隊，呢兩位球員絕對係出色嘅plan B。仲未計打完歐洲國家盃返嚟仍然跑得又射得嘅華迪同埋盛傳會(但未)去阿仙奴嘅馬列斯。喺邊線快放對手，交俾華迪入波嘅招數仍然有效。不過要擔心嘅係，今季要打埋歐洲賽，去到球季中後段球員可能會體力不繼。 | |
圖片：Skysport | |
| 今季狐狸軍團最大威脅唔係面對主力離隊，愛華頓一直想買嘅門將卡斯柏舒米高已經同球會續約，淨返嘅就係呢場患得患失嘅馬列斯。最大問題係今季英超各個對手都會當李斯特城係強隊看待，而過往取得成功嘅戰術，相信終有一日會俾破解，到時李斯特城可唔可以維持到上季咁優秀嘅成績，就睇雲尼亞里有乜計仔。 | |
李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員 由懶到出汁變成泰拳愛好者 除咗足球最鍾意就係睇戲、睇書、飲兩杯 唔求發大達，最想成為有些少生活品味嘅偽文青。 |
