| 「改裝車」，喺一般香港人眼中幾乎同「飛車」、「古惑」、「懶有型」劃成等號。「石佛」，啱啱退役冇耐嘅NBA馬刺球星Tim Duncan嘅綽號，形容佢沉著冷靜、不動如山。呢兩個字睇落去大纜都扯唔埋，但如果你到訪位於美國聖安東尼奧，馬刺主場附近一間名為「BlackJack」嘅改裝車專門店，你先會發現，原來兩者大有關係。 | |
| |
| 「BlackJack」喺「廿一點」中就係廿一點，而Duncan嘅背號就係21——成件事好清楚啦？卻說Duncan小時候都唔係一個車迷，直到高中嘅時候佢坐上朋友嘅三菱3000GT VR4，從此就被佢嘅雙渦輪引擎迷上，再引伸到對汽車嘅興趣。後來佢就開始由軚鈴、音響等慢慢接觸汽車改裝，更加透過另一位前馬刺球星Sean Elliott認識到志同道合嘅好朋友Jason Pena，如是者一直將玩車當成自己嘅興趣。 | |
| |
加盟馬刺後嘅Duncan買咗部Porsche 911Turbo，而且自己落手換咗套鈴。後來佢又添置咗GTR、Audi R8，仲有1955年Chevrlet Bel Air同1968年嘅Chevrolet Camaro。佢最鍾意睇嘅戲係《Fast and Furious》系列，最想參加嘅係賽車——當然球員時期就做唔到。到後來NBA封館，無端端放咗個長假嘅Duncan就開始想像到自己假如有一日退休，應該會悶得好緊要，咁啱喺馬刺訓練場嘅必經路上有一間改裝車店，Duncan唔止一次諗過如果可以將佢變成自己嘅鋪頭就好，於是佢就真係走咗入去問老闆間鋪賣唔賣，呀老闆又真係賣喎，於是佢二話不說就買咗間鋪，將佢改成現時嘅「BlackJack SpeedShop」，再搵老朋友Pena黎經營。 | |
| |
| 睇個名就知「BlackJack SpeedShop」嘅重點係「Speed」，事實上Duncan就連自己部GTR都改到有800匹馬力，可見球場上穩如泰山嘅佢，上到車所追求嘅嘢就好唔同。另外無論打波風格到平時生活都相當樸素嘅Duncan，一去到車就會有所唔同，「我喜歡把車保養得好好的，也喜歡改裝它們。我可以把它們弄得華麗一點、快一點，而且可以多一點巧思，某程度上是釋放比賽時的壓力吧？」。 | |
| 而根據「BlackJack」嘅員工，Duncan自己都鍾意落手落腳改裝，仲走咗去參加直線加速賽(Drag Race)。佢甚至將自己嘅興趣化成紋身紋咗上背脊。退役後佢雖然都有繼續打波，但經營「BlackJack」已經成為佢嘅主要工作。如果你去開聖安東尼奧，又想見下呢位偉大嘅馬刺球星，你依家知要去邊啦？ 參考資料：NBA 1,2、bleacherreport、Rides-mag |
