其實雲高爾本身家庭緣都麻麻地，童年時爸爸因為癌症過身，第一任妻子費爾南達亦因為胰臟癌過身，佢嘅離世更加令方丈放棄天主教信仰。而上個月佢其中一位女婿離世就再一次改變佢嘅想法，希望繼續休息陪下屋企人，不過唔知係佢講得衰定記者理解能力有問題，最後就搞出「退休」呢個誤會。總之方丈依家一鎚定音－－等到7月先決定退唔退休。

雲高爾有一份非常耀眼嘅執教履歷。佢曾經先後帶領阿積士、巴塞隆那、拜仁慕尼黑登上頂峰，2008-2009球季更試過帶領不被睇好嘅阿爾克馬爾贏得荷甲冠軍，2014世界盃又帶領當時被評為青黃不接嘅荷蘭以季軍完成賽事，即使擔任曼聯領隊英超成績麻麻，佢仍然喺上季幫曼聯贏到10年來第一個足總杯。不過曼聯球迷諗返前兩年雲高爾執教下嘅打法，就可能電視都想打爆佢，除非你長期失眠就另計啦。佢嘅另一大貢獻就係每去一隊球隊都搵到唔少新星，好似沙維、恩尼斯達、佩奧爾、湯馬士梅拿、舒韋恩史迪加、拿姆、馬迪爾、拉舒福特等等等等，點計方丈對球壇都係好大貢獻嘅。

就算喺曼聯唔算光彩，以雲高爾份CV只要佢自己唔退休根本唔愁無工開，佢自己就話除咗中超之外，而家喺西甲需要護級嘅華倫西亞亦曾經邀請雲高爾執教，不過就俾方丈一口拒絕。而意甲嘅AC米蘭同法甲嘅PSG亦有傳想搵雲高爾接手，坦白講呢兩個offer都相當唔錯，AC米蘭同之前曼聯一樣百廢待興，仲有年青門神當拿隆馬可以栽培；PSG就劍指歐聯冠軍，再加星光堵熠熠嘅陣容，對方丈黎講都一樣有難度。唔知各位知道雲高爾仲有可能再出山又有咩感覺呢？

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。