| 香港人，可能係唯一一個比日本人更愛食日本菜嘅民族，壽司、刺身、Omakase、放題，大街小港入面遍地開花，仲有唔少名店大排長龍，預約期長達數月至半年。喺男女相處嘅角度，無可否認日本菜真係屈機，從平民到貴價，從初相識到銀禧紀念，你都可以話「不如食日本嘢啦」，絕大部份女仔都唔會Say No。喺一間日本餐廳，揀返枝合襯嘅Sake，可以比起開一枝82年Lafite更令人著迷，所謂「地酒地食」，本身屬於佐餐酒嘅日本Sake配返日本菜簡直係天作之合。 |
|
ゆきの美人。純米大吟釀 (HK$480)
|
秋田縣出名兩樣嘢 : 美人、靚米，呢款「雪之美人」純米大吟釀就係秋田縣嘅出品。秋田縣NEXT5 (白瀑、ゆきの美人、春霞、一白水成、新政) 嘅其中一款清酒，精米步合達40%，以20%兵庫縣山田錦，加80%嘅秋田小町米混釀而成，約150石嘅極少年產量，以太平山麓嘅超頂級軟水釀製；具淡麗優雅之米香，豐富而細膩嘅香甜，仲有微微嘅碳酸口感帶嚟硬身嘅層次，仲要係賣HK$500樓下，抵飲到暈啦！ |
鳳凰美田。純米大吟釀 Gold Phoenix 2015 (HK$700)
|
來自栃木縣，小林酒造嘅「鳳凰美田」，其名氣之大要多得前司長唐唐 — 唐英年先生嘅加持，為香港帶嚟零葡萄酒稅嘅呢位愛酒之人，連Sake都係佢大愛嘅杯中物。使用100%日本兵庫嘅夢幻級愛山米，精米步合達到45%，矜貴非凡，仲有個香檳型酒樽，辨識度甚高。 |
尽空 梅酒 (HK$198)
|
梅酒予人嘅感覺，向來都係比較女性化，梅嘅果香、酸度比較濃厚，飲落去其實好舒服。我地成日都話情人節要搵啲男、女都啱飲嘅靚酒，呢枝「尽空」就係由芋燒酎加當地嘅南高梅釀製，採用無濾過嘅方式裝瓶，相比起用米酒、普通日本清酒做基調嘅梅酒，「尽空」呢類燒酎梅酒當然酒味同Power會更強烈，如果平時覺得梅酒太柔和，可以試下呢枝福岡縣嘅作品。 |
963 廿一年日本調和威士忌 (HK$3,280)
|
日本調和威士忌「響」大家飲得多，唔知笹之川嘅「963」大家又試過未? 東北嘅地區嘅笹之川，當年曾經協助秩父，為早期幾百桶羽生原酒裝瓶發售，其釀酒之歷史與技術係毋庸置疑嘅。呢款調和威士忌，雖然無公開詳細配方，但已確定當中有蘇格蘭威士忌同日本威士忌嘅混釀，Cask Strength、Non-Chill Filtered、Non Coloring，全部用最原始壯態嘅裝瓶，散發出非常香甜嘅雲尼拿味道，木桶香味、檸檬嘅清新帶來深度，但同時都感覺到日威嗰種和諧嘅個性。 銷售點 : Liquid Gold 至醇酒庫 |
