荷蘭國家隊喺世界盃外圍賽又觸礁，上場作客以0-2輸俾保加利亞，再咁落去2018一眾橙軍提早放假都唔出奇。輸波之後荷蘭國家隊即時炒咗領隊丹尼白蘭特，外間亦討論緊接任人選，而荷蘭足總總監Jean Paul Decossaux就承認佢哋討論領隊同技術足監人選時提過雲高爾個名。呢位先後兩次帶領荷蘭隊、2014年仲拎咗季軍，睇黎就係適合人選。但我就認為如果由佢執掌荷蘭領隊一職，套一個近排好Hit嘅生字，其實都係「Lesser evil」啫。

2014年世界盃雲高爾帶領荷蘭拎到世界盃季軍，成績令人津津樂道。最難忘當然係八強對哥斯達黎加時尾聲換入門將添．告老爾取代較年青嘅施利臣迎接互射十二碼，最後五球撲中哂方向，仲撲出其中兩球幫助球隊出線。但呢位前曼聯領隊嘅戰術偏向保守，對於依家小組只係排第四嘅荷蘭又係唔係適合？需知道目前荷蘭同榜首法國差成6分，雖然小組賽只係過咗首循環，但荷蘭已經無失分空間，特別次循環對法國同瑞典都不容有失，冇三分落袋同輸波其實冇分別，呢個情況搵方丈執教，又真係未必最適合。

所以話呢個時候搵雲高爾教荷蘭未必係最適合，但如果係做技術總監就唔同講法。唔好忘記方丈去每一隊球隊都幫佢哋搵到一班年青新星，對上一次教曼聯就搵到馬迪爾、拉舒福特、科素文沙同埋波夫域積遜。荷蘭而家正缺人材，如果方丈願意幫荷蘭發掘人材同喺戰術上為領隊提供意見，對橙衫軍團絕對有益，至於領隊方面就唔使太急搵新人選，下輪外圍賽六月開打，仲有個幾月時間慢慢搵嘅。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。