Suzuki（鈴木）靜咗一段長時間之後，今年喺香港再熱鬧赸嚟，早前有Hustler，最近有Vitara。

90年代初嘅香港車迷同用家，鍾意叫Vitara做維＿奶，純粹因為諧音有少少相似。不過，Vitara踏入千禧年之後喺香港嘅發展平平，話咁快2016，我諗都唔會有幾多新一輩車迷知道鈴木「維＿奶」係乜，講真，其實唔知仲好，因為呢一代Vitara已經變成另一種輕型SUV。

每個年代嘅人，心裡面嘅Vitara都唔同樣，有啲可能仲係三門短陣Softtop，有啲可能係五門版（車尾係雪櫃式橫揭門），有啲係配2.4公升直四或2.7 V6引擎嘅五門Grand Vitara。

第一代Vitara，1988年推出，日本版稱為Escudo，上圖為Softtop版

第一代Vitara嘅五門版喺1990年推出，日本版稱為Escudo Nomade

Grand Vitara喺日本稱為Grand Escudo，好大部

第四代Vitara喺2015年10月於日本發表，今代Vitara不但冇增大，仲比第三代縮咗水，總長短咗125mm，矮咗85mm同窄咗35mm，軸距亦縮短140mm，成部車細咗，係因為要轉打輕型SUV巿場，所謂「轉打」，咁講法其實唔準確，Vitara初登車壇就係輕型SUV（嗰時仲未流行SUV呢個term），而家其實只不過回到當年嘅定位同相近尺碼（新Vitara長4175mm；元祖五門Vitara長4031mm）。

「四米（音：mic）車」，呢啲先至大眾化SUV Size，想喺窄路攞位同公家窄位泊車輕鬆啲，間中「偷雞」擺吓路邊又阻到街坊嘅話，呢類車好啱。仲有冇其他選擇？有，可以揀日產Qasaqai或萬事得CX-5 2.0，不過前者車長4.3米，後者更達4.5米，亦只屬前輪驅動，如果住處喺新界或村屋地區，多斜路多90度暗斜彎位，路面鋪裝多凹凸位，落雨天例牌有泥有水，MenClub覺得始終有套四驅系統看吓門口好。

今代Vitara有佢蝕底之處，例如只配1.6公升直四自然吸氣引擎，最大馬力只有118匹，峰值扭力15.9kgm。對住啲怪獸車客，仲唔彈爆你俾2000c.c.牌費得嗰1600c.c. Power咩！而且得嗰118匹馬力，一定冷笑收場，車都懶得去試。

haha，香港就係咁刻毒涼薄㗎喇！死未？

如果你唔係部份汽車用家咁，拎住三幾個數字就批死一部車，咁請你睇埋以下我哋嘅觀點。今代Vitara車重只有1250kg，以輕型SUV嚟講，車算係輕，而且已經配備6前速自動波同電子選擇模式嘅四輪驅動系統，咁嘅package好獨特，我搵唔到巿場上有邊款車係車咁輕，有6速自動波兼有選擇式電子4WD，真係冇。日本廠方嘅耗油數字，每公升汽油可行駛17.5公里（日本國土交通省JC08測計標準），即使一蚊一公里都仲係抵。

新Vitara配稱為ALLGRIP嘅電子式可變四驅系統

今次試車，由九龍灣經龍翔道、呈祥道、青山上路、荃錦公路、錦田、元朗，再經吐露港公路返九龍，山長水遠，就係想試得真啲。

望落Vitara似高身車，但坐上去，hip point唔算好高，純感覺評價，車嘅重心唔高，由龍翔道（星輝豪庭）飛到明愛快相位前呢段，成部車抗傾力充裕而自然，懸掛韌性不俗，只嫌懸掛工作時低頻噪音多啲。車嘅外形，我覺得都係上代靚啲，呢隻名為Altantis Turquoise嘅藍色車身，我麻麻dee，但喺太陽底吓望耐咗，覺得幾有新意，幾突出。

Vitara呢套新開發嘅四驅系統稱為ALLGRIP，有Auto、Sport、Snow及Lock四個模式，喺大部份時間試車，我揀Auto，呢個狀態下，會以前驅為主，遇到有跣胎或打滑即轉入四驅模式。今次配嘅215/55 R17尺碼嘅馬牌（Continental）ContiPremiumContact 5輪胎，抓著力、早段緩震同抑制胎噪水平嘅表現都相當唔錯，比起「求求其其」跟套日本入門級車胎好得多。喺荃錦公路遇上溪水溢出馬路，揸快啲，刻意遲啲扭軚入彎，前輪抓著力仍好豐富。

Sport模式嘅引擎同油門反應敏感咗，系統自動切換至四驅，喺一、二波起動力強咗，但引擎聲浪亦高咗，嘈唔嘈呢？仲可以接受，轉到三、四波，部車都夠晒力，唔使再扯咁高轉。咁呢副引擎有冇underpower呢？我唔覺，兩三個大人坐，一定夠力，加速表現絕對可以算得上輕快、輕鬆。Snow模式.......請問香港幾時再有雪？Lock模式，要搵爛泥行吓，可惜代理今次不設越野 路段試車環節，Sorry。

6前速自動波，要用手動轉波模式，撳軚盤軸上面嘅加減轉波撥片就得

車輕，只重1250kg，配1.6公升直四引擎已夠用有餘，最大馬力118匹，峰值扭力15.9kgm

要進入鎖合（LOCK）狀態，先要選擇雪地（SNOW）模式再按LOCK掣

喺Sport模式下再以手動模式轉波，加速爽好多，喺山路快揸，有玩味

有引擎怠速Start Stop同Down Hill Assist功能，

Vitara後座椅背只可以向前壓低，呢個安排同近年好多日本掀背車相似，睇相你會發現，行李間嘅平台點解零舍低咗一級，實情係行李間平台有兩級，將墊板放喺高嗰一級，就可以同椅背「尾龍骨」位呈同一水平嘞。前後座頭頂空間幾鬆動，真皮mix仿猄皮嘅座椅亦幾grip，就算後座造型較平坦，坐後面過急彎，仿猄皮部份都啜住大腿、臀部同背脊下半部。

頭頂空間充裕，天窗底裝有電動遮簾，設備算幾齊

後座雙腿伸展空間OK，惜門檻稍高且闊，落車提腿時可能碰到內門板或門檻

行李艙兩側格板可以裝拆，並附有橫閂，折走之後可以放長身物件，例如釣魚桿或金屬桿

呢個年代，愈來愈多輕型SUV畀套車胎repairing kit你就算，

Vitara仲有跟埋「士啤胎」，或多或少有考慮到野外駕駛嘅實際需要

Suzuki自2011年嗰代輸港嘅Swift，車廂裝造手工質素都好咗好多，我個人覺得甚至比部份豐田車系，做得精緻同滑溜，我最初都好難相信，但現實就係咁。新Vitara嘅中控台、中槽同好多掣、按鈕，都更加精緻。老實講，黑色車廂塑膠，唔講得有咩工藝可言，但摸落滑啲，接駁口緊緻啲，冇乜雜聲，人哋自然覺得你認真咗，靚咗，同高級咗。

出風口、時鐘、冷氣位嘅裝造手工都相當滑溜緊緻，唔係hea做

有時覺得Suzuki呢間車廠幾過癮，話佢科技落後hea做，肯定唔係，你睇佢今次喺Vitara套四驅，由四個模式設計同個控制鍵嘅design，都係有心思有抱負，仲溝埋個6速加減自動波，擺到明係想喺呢個segment搞出新局面；但你話佢先進好潮咩，又唔係，明明手上已經有最新款嘅Downsizing Turbo引擎，佢偏偏配副得嗰118匹1.6公升直四自然吸氣，完全唔介意畀啲已發展地區嘅閹尖準買家睇少（其實夠用有餘），硬係要打「穩陣波」，唔知係唔係想維修成本平啲（當中涉及代理維修配套及投資），Keep住好口啤，搏日後有「返頭客」。

當世愈來愈多「滑頭仔」，見人講人話，見鬼講鬼話；車壇如是，嗰期興乜R & D就搞啲乜，你鍾意大馬力你嘛，畀多啲你，塞住你把嘴！擇善固執，保持自己風格，又加入新技術去製車兼有錢賺嘅車廠，我真係數唔到幾多間。

如果你對Vitara有興趣，希望你係真心認同佢嘅真材實學，而唔係純粹因為啱價或揀無可揀先買。完！

Suzuki Vitara規格

售價：$229,800起

代理：Island Motors www.suzuki.com.hk

車型：五門五座

體積：（長）4175mm x （闊 ）1775mm x （高）1610mm

軸距：2500mm

引擎：1586c.c. 直列4汽缸，前置引擎

馬力：118匹/6000rpm

扭力：15.9kgm/4400rpm

波箱：6前速自動，四輪驅動

懸掛：（前）麥花臣支柱；（後）扭力桿

制動：（前）透氣碟；（後 ）實心碟

車重：1250kg

耗油：17.5km/L（日本國土交通省JC08測計模式）

輪胎：Continental ContiPremiumContact 5 215/55 R17 94V