日本好多漫畫Cafe可以畀你慢慢hea，hea到瞓著都仲得，不過Cafe始終係Cafe，坐就Ok，但想用嚟瞓覺嘅話，未必咁適合。如果想睇完漫畫之後舒舒服服瞓返覺嘅話，不如考慮下日本最新漫畫旅館「漫泊」丫！

「漫泊 MANGA ART HOTEL」係位於東京都千代田區神田錦町嘅最新漫畫旅館，啱啱2月先開業，佢結合咗旅館同漫畫店兩種主題，仲提供咗5000幾部漫畫畀顧客觀看，如果睇完啱心水想買嘅話，一樣冇問題。另外呢度除咗日文漫畫之外，為咗方便遊客閱讀，仲有成千本英文版漫畫，就算唔識睇日文，一樣可以享受睇漫畫嘅樂趣。

「漫泊 MANGA ART HOTEL」一共分兩層，分別畀男性顧客同女性顧客使用，全館有成35間臥室，裡面仲有沖涼設備，相比起漫畫Cafe真係舒服得多。