文:MenClub 波特先生  圖:互聯網
POSTED ON February 13, 2019 9:30 pm

尋日一場活塞對巫師嘅比賽入面,巫師核心Bradley Beal全場交出32分10助攻6籃板,但仍然阻止唔到球隊輸波。而喺比賽期間,Beal更有一次成為聯盟話題嘅動作,唔知大家又點睇呢?

話說Beal在比賽最後一節餘下7分鐘左右嘅時候運球突破,點知衝向籃底嘅佢收球後竟然喺走左兩步之下仍未出手,之後再公然走多三步先將球傳出去。不過令人驚訝嘅係,現場所有球證都無人吹Beal走步,最終更吹罰活塞球員推人犯規。

可以睇到,離Beal最近嘅Blake Griffin見到Beal走步之後隨即大喊,但球證讓比賽繼續進行,唔通班球證真係盲嘅?

對於Beal明顯走步,Griffin賽後亦進行揶揄,表示Beal應該係Hack左入NBA球證嘅帳戶,令佢地唔吹呢次犯規。

而Beal賽後則喺網上留言表示自己呢次「走步」係無問題的,再加上笑哭嘅emoji,明顯佢自己都覺得球證無吹罰係搞笑的。

其後令人意外嘅係,NBA球證協會對Beal嘅「走步」作出解釋:「進攻球員右腳落地,其後踏上兩步,但失去了對球嘅控制。重新控球後,該球員可以重新抬起軸心腳,落地前可以做出傳球或投籃動作。所以這不是走步。」

失去控制?好明顯當時係Beal自己失去對球嘅控制,然後又可以自己拎番個波繼續走,咁係咪即係話我一路失去控制,一路又拎住個波繼續喺場上走,咁樣以後大家打籃球真係唔使拍波啦。

有趣嘅係,Beal之後都轉發球證協會嘅解釋,並配上一個笑樣。如果NBA球證繼續咁樣無視走步問題,真係會令球迷們大失所望。