猛虎射球作為《足球小將》早期威力最強嘅射門，佢可以輕易喺半場位置起腳射去門角而爆波...當然現實基本上係無乜可能做到，但係射出類似威力嘅射門則應該唔少，而呢一球則絕對係最經典嘅其中之一。

講緊嘅就係荷蘭名將施多夫喺1997年效力皇馬期間，喺半場前少少嘅位置右腳勁射破網嘅一球「猛虎射球」。

施多夫呢一腳，位置接近離門40多碼，但射出個波因為勁度十足，所以係平飛狀態直飛入網的，期間並未見到有太大嘅減速，而門將仍都係欲救無從。

呢位荷蘭名將，除左曾效力皇馬之外，亦曾效力阿積士、森多利亞、國際米蘭、AC米蘭及保地花保，而其中效力AC米蘭期間長達10年時間，當中亦都不乏精彩嘅勁射。