三星繼預告明年發布可摺疊智能手機後，日前再發布新一代智能摺機W2019。呢部摺機與Feature Phone嘅摺機外型非常相似，功能及價錢上就差天共地，W2019用上咗旗艦級高通Snapdragon 845處理器，而售價更直逼2萬人民幣。W2019係中國限定嘅手機，主打商務用家。

三星嘅智能摺機W2019採用Android作業系統，配備底面雙重螢幕，兩個螢幕都分別為4.2吋S-AMOLED顯示屏，解像度為1920 x 1080。W2019作為摺機當然唔少得實體數字鍵盤，而機身側面按鈕更設有指紋辨識系統，方便用戶進行解鎖。

雖然W2019係一部摺機，但佢係主打商務客，所以規格都非常高，佢配備咗高通Snapdragon 845處理器，記憶體及容量為6GB RAM及128GB，電池容量為3,070mAh。相機方面，佢配備12MP + 12MP雙鏡頭系統，最多可支援960 fps Full HD慢動作影片拍攝。售價方面為18,999人民幣，有金、銀兩色選擇，而W2019噚日「雙11」正式喺中國開放預售。