華為早於今年2月舉行嘅世界移動通信大會(MWC)中發布咗摺Mon手機—Mate X，並原定於6月推出，但華為遭到 Google 封殺後，向 CNBC 表示仍想使用 Android 作業系統，目前 Mate X 推出已暫緩至9月。

自中美貿易戰火重燃後，中國手機製造商華為受到重點招呼，其中 Google 已經終止華為嘅部分業務來往，華為手機目前已失去 Android 作業系統更新資格，而且唔可以用 Google Play、Gmail 等 Google 服務。

相信事件影響華為對推出旗下首部摺Mon機 Mate X 嘅部署，而華為亦向 CNBC 表示仍然想使用 Android 作業系統，不過同時華為亦預備好自家系統，以作兩手準備。

仲記得首個推出摺Mon機手機 Galaxy Fold 嘅 Samsung，因傳媒評測後集體出現壞 Mon 問題，所以至今仍未有推出日期。而華為發言人亦向 CNBC 指出，華為唔想發佈會損害公司信譽嘅產品。