不做情人，做隻貓做隻狗？錯錯，做貓做狗，不如做吉祥物，職業體壇的吉祥物表演者，係就係辛苦啲，但計起上來，工作穩定又有保障，分分鐘好過半紅不黑嘅運動員。

魅力勁

小島移情，大島亂政，睇見屍政報告慘不忍睹島，呢個地方變成明日大愚，我哋只能自求多福，其中一條就係飛去美國做吉祥物，有得睇波之餘，仲可以同粉絲打成一片，極多女冧你。美國體壇大、小聯盟嘅球隊，總有一隻吉祥物做賣點，美職棒費城人吉隆坡物，係一隻叫Phillie Phanatic嘅綠色毛公仔，唔係特別得意，但銷量勁到一個點，2016年零售額佔主場收入的10%，魅力超過球星。

粉絲眾

唔止咁，今年22歲嘅NBA活塞吉祥物Hooper，人氣高企，網上與速龍吉祥物Kiki嘅對決，令人百看不厭，笑到有腹肌。9月份，活塞為Hooper在社交網站搞投票，網民從29段搞笑片選出最愛，總瀏覽次數接近70萬。球員唞暑，部分職業球隊嘅吉祥物無得唞，全年無休，數萬粉絲也見怪不怪。

常出動

美職聯底特律老虎專門為Roary設立粉絲會，40美元(313港元)會費可參加不同活動，同時設有訂票優惠，只要14歲以上便可入會。老虎隊另一吉祥物Paws全年出動500次，勤力過球員，兼且經常現身喜慶活動，歡迎個人和公司邀請，每小時1250港元，而Roary身價更高，索價每小時1370港元。

秘撈多

吉祥物表演者供不應求，收入水漲船高，棒球小聯盟每場比賽最低時薪都有117港元，最高可達390港元，全職年薪可達23.5萬港元（當中包埋醫療保險等員工福利），仲有大把時間俾你搵秘撈。大聯盟球隊，吉祥物表演者收入已達58.7萬港元年薪以上，白領們望塵莫及，甚至比合約無保障嘅大後備更加好搵。

需交戲

要做一隻成功嘅吉祥物，首先要唔怕臭，其次係耐熱度高，第三係要入戲，最後係要嚴格遵守行規，無論網上網上都被禁止表露真身，直至退役為止。一名美國資深表演者由1978年開始首次扮演Phillie Phanatic，當年每場比賽收入195港元，轉眼做了17年，退役時年薪已達6位數美元，超過百萬港元！