{ SKIP }
文:傑克  圖:互聯網
POSTED ON 02 Feb 2019

以往,打工仔只需具備勤力、毅力、工作能力,已經足夠搵兩餐,唔憂做。但時移勢易,家陣打工,只得以上能力想話安安穩穩安守本份都未必得,因為每個老細都覺得下屬要有超人能力去應付各種工作,所以大家要成為超級打工仔先有能力在職場打滾呀!

表達能力

打工仔以前只需接order工作,老細分工俾你,你做得好好睇睇就足夠。但隨著老細變本加厲,不斷加重員工負擔,如果你唔識講出自己工作的難處,向老細講解工作境況,就只會日日OT到三更半夜,都未必做得晒所有工作,仲要俾老細覺得你工作能力有問題!況且,有良好的表達能力,又可以向同事講解清楚工作詳情,好好分工合作,而當俾老細問罪時,都可以好好解釋,唔會食死貓。

趕工能力

經濟環境似暖還寒,公司有生意一定多多都接,而且仲要客人永遠是對的,對方有不可能的要求,公司都一一答應,然後就迫使員工在極短時間內做好。所以,唔好再以為每項工作都有充足時間去做,新一代打工仔要掌握在有限時間做無限工作的能力呀!

應變能力

以往,很多工作都有程序與步驟,只要員工學曉了,以後接到相同工作,跟著去做就可以了。但科技發展得太快,同一樣工作今日這樣做,三個月後就話要加新點子,如果應變能力稍低,學習能力稍弱,人家講樣樣新事物,你通通搭不上嘴,好快你就會被時代所淘汰。

睇化能力

今時今日,打工仔日日做到冇停手,結果換來雞碎咁多人工,每年加薪不過幾舊,上流階梯又俾班老seafood霸住晒,做十年八年都升唔到一級半級,如果對工作尚有一點爭勝心,不懂看破世情,只會辛苦自己,日做夜做唔知為乜。一係灑脫地離開,尋找真正人生目標,否則真係要練成睇化能力,睇化世情,繼續過活,才會找到一點開心。

//我們看到政府工表面的好處如人工高、福利好、夠穩定,其實有好自然有壞,政府工都有唔少壞處。//
powerandmoney
傑克 - 做政府工的壞處
17 Sep 2019
//不少球員成名靠球技,但食飯靠樣貌,受傷事小,毀容事大。擅長玩肖像權的球會不多,皇馬是表表者,2000年葡萄牙球星Figo加盟時,90%肖像權屬於球會,即使年薪達900萬美元,單是商業收入每年可為球隊帶來2000萬美元 ...
powerandmoney
玄火 - Dybala無法離「祖」之謎
16 Sep 2019