山系風格喺日系潮流界都吹咗好幾年，除咗可以歸咎於日本人熱愛大自然，得閒就去吓 Camping ，行吓山之外，計我話最不可多得嘅應該就係各大户外運動品牌一波又一波嘅攻勢啦。

户外運動品牌嚟講，就以作為日本土炮嘅 Snowpeak 作例，佢哋就十分熱心宣傳露營文化，除咗推出一系列嘅露營商品同服飾，仲會定期舉辦露營會令大眾接觸更多露營文化；又或者好似外國勢力 The North Face 同 Columbia 咁，去到日本後，積極向潮流方向發展，前者有 The North Face Purple Label，後者則有 Columbia Black Label，吸引日本潮人穿著並軟性宣傳户外運動文化。

當中，The North Face 可以話係最為港人熟悉，除咗因為香港多分店外，同時亦因為 The North Face 經常同各大品牌作聯名，例如近期再度聯名嘅 Mastermind World。而近期日本方面嘅 The North Face Purple Label 亦不甘示弱，搵到日本 UNITED ARROWS 旗下品牌 Beauty & Youth 合作。

是次雙方嘅聯名繼續兩個品牌嘅一貫作風，簡約，但又不失特色。設計上未見花巧，卻喺用料上花上心思，用上抓毛 (fleece) 物料，除咗外表上增加細節外，功能上更能增添保暖程度；至於配色方面，各項單品除咗提供最基本嘅黑色之外，更有提供泥啡色嘅選擇，方便配搭大地色系嘅日系穿著，特別係山系穿搭。

呢個系列已經喺日本上架，網上店更有部份 Size 賣完，大家有興趣就要快手，或者搵喺日本嘅朋友幫幫手啦。