世界杯臨近，正當《FIFA 18》密鑼緊鼓宣傳全新世界盃模式嘅時候，《PES2019 (Winning Eleven2019)》今日正式公布遊戲推出日期，北美版本將於8月28日發售，而亞洲及歐洲等地區將於8月30日發售，並於PS4、Xbox One及PC(Steam)平台登陸，所有平台均支援4K HDR。

《PES2019》即將接受預訂，而遊戲版本分為3個，包括「傳奇版本」、「David Beckham版本」及「基本版」。

剛剛失去「歐聯」版權嘅《PES2019》難免失色不少，但官方公布消息指，遊戲將新增大量授權聯賽，但細節有待公布。另外，遊戲亦新增落雪天氣，比賽途中唔只會出現雪花，遊戲玩法都會受到影響，玩家要根據天氣情況策劃戰術；而遊戲採用咗照明增強軟件，對遊戲自然光及露天球場燈光重新製作。遊戲內同時加入11種新動作，包括落葉曲墜球、No Look Pass等。

《PES2019》myClub將引入表現優秀的球員，根據球員喺上星期比賽表現，從佢哋嘅統計數據可獲得限時新技能。而myClub亦會出現Beckham、Maradona、Cruyff、Nedvěd、Gullit、Maldini以及Kahn等傳奇球員。

喺《PES2019》首個預告片入面，重演咗Beckham 1996年曼聯對溫布頓嘅中場笠射，亦有代表國家隊嘅經典罰球。

來源︰KONAMI