E3仲有一日就要開始，Xbox今日安排咗傳媒試玩活動。其中日前Xbox展前發布咗嘅《Jump Force》今日亦都可供簡單試玩，遊戲嘅畫面非常細膩，可以用「爽」嚟形容每次出招，打擊感同流暢度都非常好，而且十分容易上手，搵埋女朋友一齊打都仲得！

喺《Jump Force》嘅試玩中只提供咗3對3嘅對戰模式，當中有《龍珠》、《火影忍者》、《海賊王》嘅角色選擇，但遊戲內仲有無其他對戰方式就仲未知。而試玩內3個遊戲角色會共享同一條血，每個遊戲角色亦有4個必殺技，用Xbox手掣撳RT鍵+A、B、X、Y就可以出到。

係悟空嘅龜波氣功！

超級撒雅人形態！

另外，亦試玩咗新加入季節系統嘅《Forza Horizon 4》，筆者試玩嘅係Full Gear連軚盤、筒椅嘅4D系統，所以真實感十足！每次碰撞都會feel個人就嚟飛出去，加上春夏秋冬唔同季節都非常影響駕駛操作。

尤其是雪地上嘅操作就更困難！