小米8探索版以透明機背為主要賣點，當初推出時機背可以睇到機內嘅高通Snapdragon晶片以及電路板，令一眾「米粉」都非常期待。但日前「i冰宇宙」喺微博流出咗幾張小米8探索版機背電路板圖片，「i冰宇宙」指出呢塊係「一塊複雜蝕刻工藝的裝飾性主板」，啫係話塊板只係「裝飾」。

喺小米8探索版正式發佈之後，呢個透明機背引起咗唔少網民討論，但亦有網民質疑透明機背嘅電路板只係一張裝飾貼紙，並唔係機身零件一部分。由「i冰宇宙」流出嘅電路板圖片中睇到，電路板根本無連接手機內部電路，亦都可以見到電路板無球柵陣列(Ball Grid Array)連接，所以真正嘅電路板其實藏喺「裝飾」電路板之下。

小米手機產品市場總監臧智淵事後喺微博發文表示，「雖然其(電路板)沒有功能，但卻有著主板相同用料和工藝，甚至更為嚴苛的無塵環境，畢竟任何一粒灰塵都會在透明玻璃下格外扎眼。不能說是愚弄，更不是貼紙。因為這是一種外顯的炫耀」。

來源： 微博、Engadget