唔少科學家指出，火星係目前最適合人類居住嘅星球之一，但實際上如何喺火星上居住仍需要科學家們努力探索。NASA自2014年起舉辦3D打印火星棲息地設計比賽，比賽分3個階段進行，而今年7月就進入咗比賽第3階段，並喺世界各地18支參賽隊伍中選出咗前5名作品。前5名參賽隊伍都會得到100,000美元獎金，並於明年打印出1:３比例模型。

比賽分3個階段進行，頭2個階段主要係提交平面圖及材料、技術等構思；而第3階段中，參賽隊伍需使用專業建築資訊模型BIM(Building Information Modeling)設計虛擬火星房屋結構。按比賽規定，火星棲息地嘅生活空間至少要有1,000平方呎(喺香港係豪宅嘅大小)，降落後要即時自行組裝，強度足以令4位太空人喺火星嘅惡劣環境條件下生活12個月。

Zorpheus團隊獲得比賽第1名，佢哋設計咗一個類似蜘蛛狀嘅巨大著陸器，並使用火星混凝土嚟建造。

第2名由AI SpaceFactory獲得，佢哋設計咗一個類似花樽狀嘅建築物，由火星嘅玄武岩纖維製成，可以達致熱膨脹及保溫效果。

Kahn-Yates獲得第3名，佢哋嘅設計可以透過孔洞令自然光進入建築內部，並有一條螺旋狀樓梯延伸至建築物外。

獲得第4名嘅SEArch+/Apis Cor，佢哋嘅設計有兩個獨立加壓區域，除咗可以令光線最大化，亦可以令輻射曝露最小化。

第5名嘅美國西北大學設計嘅建築物建造喺一個可膨脹嘅底座上，而建築物外部穹頂有一個雙層充氣外殼，而當中更有廚房及臥室設計。