今日Leica舉辦「Motion Blur Workshop」，邀請咗專業攝影師Jeremy Cheung講解關於動態模糊(Motion Blur)嘅攝影技巧。另外，上月底推出嘅Leica全新多功能便攜相機C-Lux亦有現身工作坊，機身輕巧、鏡頭變焦能力強大。

Jeremy Cheung喺工作坊中講解咗4種唔同嘅Motion Blur，第一種係「Long Exposure」，喺相機固定及主體處於移動狀態下，以慢快門拍攝嘅影像背景清晰，而主體因移動導致模糊。

第二種係「Zoom Effect」，喺拍攝固定主體時扭動Zoom鏡，令影像有「穿越時空」效果；第三種係「Rotating Effect」，拍攝時轉動整部相機製造出「旋轉」效果，令影像中心相對清晰，而外圍因轉動而模糊；第四種係「Pan鏡」，拍攝時相機以線性移動，令主體清晰及同時令背景模糊。

喺工作坊上同場加映咗Leica上月底發售嘅C-Lux，部新機拎上手非常輕巧，外型亦非常靚仔。除咗得個樣之外，佢仲有等效焦段為24-360mm嘅15倍光學變焦鏡頭，仲可以拍攝4K影片，去旅行影相、拍片就啱晒！Leica C-Lux香港售價為$8800。