寶麗來自1977年推出OneStep即影即有之後，相隔40年終於喺舊年推出後繼機型OneStep2。今日呢部即影即有再度進化，寶麗來宣布推出最新即影即有相機OneStep+，新機除咗可以連接手機App之外，仲有入咗多個新功能，寶麗來Fans快啲嚟睇吓呢部9月1日推出嘅新機賣幾錢！

呢機部新推出嘅OneStep+同舊年推出嘅OneStep2外型非常相似，但兩部機最大嘅分別就係新機加入咗藍牙連接，透過「Polaroid Originals App」你可以利用手機或者平板電腦連接OneStep+。從相片中可以睇到，舊款嘅OneStep2喺鏡頭左上角為「定時自拍掣」，而新款嘅OneStep+喺鏡頭左上角為「藍牙連接掣」，但只要連撳兩吓，一樣可以定時自拍。

連接OneStep+嘅 「Polaroid Originals App」有六大功能，包括「遙控」、「定時自拍」、「雙重曝光」、「光繪(Light Painting)」、「聲控拍照」及「手動拍照模式」。

其中新功能「光繪(Light Painting)」可以透過App拍攝，當喺App內按下快門掣後，可以喺App內同時啟動手機電筒，即時以手機嘅燈光畫出線條。但經過筆者測試後，要掌握即影即有相機嘅拍攝範圍畫出圖案都唔容易，事關OneStep+無屏幕畀你預位置，所以建議先燒幾張菲林練習一下先，而且我強烈建議大家用腳架(相機底有螺絲位配腳架)！

寶麗來同時推出咗唔同Filter，適用於OneStep+及OneStep 2。

OneStep+同時支援寶麗來經典600及i-Type系列相紙。

總結： 

OneStep+同一般寶麗來即影即有相機嘅體型都差唔多(差唔多咁大部)，所以無用開嘅朋友未必可以好容易駕馭。加上潮流興Selfie，用手揸機影即影即有好易會影到會頭好大，所以新加入嘅遙控功能的確係Selfie好幫手。不過寶麗來相機都有一個通病，就係相紙貴，而且一盒得8張，所以每影一張相都要三思啊！今次OneStep+加入咗咁多新功能，所以加價都在所難免，OneStep+售價為HKD$1599，而舊年推出嘅OneStep2去年售價為HKD$1099。

寶麗來OneStep+：

9月1日推出　

售價為HKD$1599

支援藍牙連接

60天電池壽命，充電界面為Micro USB

尺寸為L 150 x W 111 x H 97 mm

重量為1.08磅