經常會見到關於Tesla創辦人Elon Musk嘅媒體訪問，但今次佢接受美國諧星Joe Rogan邀嘅直播訪問就非常別開生面。喺訪問中兩人除咗傾到Tesla、太空旅行、人工智能等話題外，仲獻出佢喺直播節目上嘅「第一次」吸食大麻。有唔少人批評Elon Musk食大麻，加上壞消息影響，Tesla股價重挫6.3%，不過Elon Musk似乎唔多Care，仲講到其他未來新科技！

節目中受邀吸食大麻

Elon Musk日前接受Joe Rogan嘅YouTube直播節目訪問，兩人一邊飲住Whisky，一邊暢談科技話題。節目期間Rogan點起咗一支大麻，好奇嘅Elon就問對方係食大麻定雪茄，而Rogan就隨即反問Elon食過雪茄未，Elon就回答食過，及後Rogan仲邀請Elon一齊喺節目中食大麻。雖然Elon有食過大麻，但佢澄清指自己無經常食大麻嘅習慣，又表示食大麻對提高生產力無幫助。

節目完結後，Elon Musk嘅Twitter受到一眾網民「洗板」， 更有唔少人留言表示對Elon Musk公然喺節目中食大麻大感驚訝。同時，Tesla亦面對人事變動，延續由年頭開始嘅逃忘潮，今次決定離任嘅係Tesla首席會計總監Dave Morton及首席人事總監Gabrielle Toledano。喺食大麻及高層離任事件發酵下，Tesla(TSLA)星期五喺美股由280.95美元重挫至263.24美元，足足跌咗17.71美元，跌幅達6.3%。

事後受美國空軍調查

針對Elon Musk喺節目中吸食大麻，美國空軍對此展開調查，事關Elon Musk旗下嘅太空公司SpaceX與美國空軍簽訂咗多份高價值合約，而且美國禁止持有政府安全許可嘅人吸食大麻，所以美國空軍採用正常程序處理事件。不過喺Elon接受訪問嘅地點加州，喺今年初已經將消閒用嘅大麻合法化，但目前美國仍有約40個州份未將大麻完全合法化。

設計垂直升降電動飛機

至於喺訪問中，Elon Musk提到自己設計咗一種「電動噴氣式飛機」，飛機能夠喺高海拔地區進行垂直升降，以及進行超音速飛行，佢認為新設計較現有飛機更優勝。Elon續指，電動飛機要飛得高一定要克服重力勢能，只要能夠克服呢一點電動飛機就可以進入高海拔地區，而飛行所需能量亦會大幅減少，所以製造電動飛機需要考慮電池組能量密度嘅問題。

但及後Elon Musk表示電動飛機非當務之急，而推動電動車、太陽能發展係更為迫切嘅事。佢批評大眾過份依賴化石燃料，又指出人類開採石油等化石燃料，係歷史上最為愚蠢嘅實驗。Elon指出，從長遠嚟睇終有一日會耗盡石油等資源，所以我哋要加速過渡為採用可再生能源，以維持大家嘅交通方式及能源基礎設施。訪問完結前，Elon認為世界需要更多愛，又指會花更多時間陪伴家人、朋友，及減少使用社交媒體。

來源：CNN、The Verge