Elon Musk旗下嘅太空科技公司SpaceX喺上星期預告咗今日會正式公布全球首位月球觀光客身份，而佢就係日本億萬富翁前澤友作(Maezawa Yusaku)，繞月旅程即將會喺2023年展開，佢仲會邀請其6至8位藝術家一同去月球觀光，一齊了解吓詳細旅程資料。

今朝SpaceX正式公布咗全球首位月球觀光客身份，佢就係42歲日本億萬企業家兼藝術收藏家前澤友作，佢由1998年成立咗Start Today公司，並於2004年創立網上時尚零售網站Zozotown，根據Forbes估計，截至2017年5月前澤友作淨資產為36億美元，喺日本富有榜排第14位。

有錢人嘅旅程當然係唔同啲，除咗飛上月球外，前澤友作仲一口氣買晒SpaceX嘅巨型火箭Big Falcon Rocket(BFR)所有座位，並發起咗名為「dearMoon」嘅項目，計劃喺2023展開嘅繞月旅程邀請6至8位藝術家一同前往月球，當中包括畫家、攝影師、音樂家、導演、服裝設計師及建築師。前澤友作表示：「自小就嚮往月球，所以唔能夠錯過呢個機會，亦想擁有今次絕妙嘅體驗，但自己唔鍾意孤獨，所以要同大家分享今次經歷」。

今次嘅繞月旅程同早前公布嘅一樣，會由巨型火箭Big Falcon Rocket(BFR)運載旅客升空，預計於2023年進行，為期大約一星期。BFR喺抵達距離月球表面約200公里嘅位置環繞月球一周後，就會返回到地球。

Big Falcon Rocket其實係分為火箭及宇宙飛船兩部分，總長118米，佢可以將150噸負重發射到Low-Earth Orbit(低地球軌道)，能夠將人類送上月球及火星，係SpaceX最強大嘅火箭。