Apple今個秋季嘅第二場發布會正式結束，今次推出咗全螢幕嘅iPad Pro外，仲有久未Update嘅MacBook Air及Mac Mini推出。不過喺曾發布會前都曾經有唔少產品傳過會有發布消息，我啲一齊盤點一下當中有啲咩產品！

iMac

有「最強蘋果分析師」之稱嘅郭明錤曾經透露，Apple正開發緊一款升級版處理器及「顯著性能提升」嘅新iMac，屈指一算iMac對上一次更新已經係2017年6月嘅事，作為Apple嘅皇牌Desktop電腦產品，估唔到隔咗超過一年仲未有更新，睇嚟要寄望出年嘅WWDC大會。

MacBook

自從啱啱嘅發布會推出咗MacBook Air後，原有嘅12吋MacBook處境就變得更尷尬，兩者體型上相當接近，而且售價及效能新MacBook Air都比MacBook更優勝，如果要買Laptop我不如買MacBook Air，要娛樂可以㨂iPad，除非新Macbook降價推出，否則再推新版都有機會被自己產品打殘。

iPad Mini

郭明錤亦曾經指出，久未更新嘅iPad mini有可能亮相Apple發布會，事關iPad Mini3年來都未有更新過。郭明錤曾估計第5代iPad Mini會採用新處理器及低價螢幕，但隨住Apple發布會曲終人散，相信年內會出現新iPad Mini嘅機會微乎其微。

AirPods

AirPods推出至今已經有接近兩年時間，期間曾經傳出會喺發布會推出新嘅AirPods 2，並加入防水性能、免提Siri對應及主動降噪功能，同時仲會採用新嘅W2晶片，而至今仍未有消息。不過新iPad Pro連3.5mm及Lightning接口都無，相信Apple仍然會力谷藍牙耳機，相信AirPods推出更新只係時間問題，大家不妨畀啲耐性。

AirPower

由上年發布至今嘅無線充電板AirPower，直至今日仍然消失得無影無蹤，連續兩個秋季發布會連提都無提過，係咪要胎死腹中？早前有傳媒爆料指，一直遲遲未有消息係因為產品遇上「過熱」問題，當AirPower進行無線充電時會導致過熱，影響到充電速度以及充電嘅準確性，所以目前AirPower嘅表現係絕對唔合格。按目前AirPower情況估計，今年都未必可以推出，甚至要有被Apple放棄嘅可能。