Razer(雷蛇)繼上月喺台灣發布咗第二代電競手機Razer Phone 2，噚日亦都喺香港正式發布。Razer Phone 2外型同上一代好似樣，不過加入咗特製嘅均熱片散熱系統，配上120Hz螢幕，遊戲體驗的確比上一代有所提升。

電競手機當然要講講遊戲效能啦，作為Razer第二代嘅旗艦級手機Razer Phone 2，佢採用咗均熱片散熱系統，佢能夠增加手機嘅散熱面積，令手機可以長時間保持高幀率顯示。以我用Razer Phone 2玩完半個鐘《PUBG Mobile》後，摸上手部機唔算好熱，叫做可以接受嘅程度。

此外，Razer Phone 2採用咗高通Snapdragon 845 CPU及Adreno 630 GPU，令手機較上一代提升效能達30％。同時，手機採用咗5.7吋UltraMotion IGZO 120Hz螢幕，螢幕更新頻率及觸控取樣同樣達到120Hz，而螢幕亮度較上代屏幕提升達50％。

Razer Phone 2機背分別有1,200萬像素廣角搭配1,200萬像素像素2倍變焦雙鏡頭，及電競RGB燈效。鏡頭採用專門針對低光環境而設計嘅Sony IMX感光元件，能夠有效確保相片良好雜訊控制能力及廣闊色域還原能力。

Razer Phone 2有達到IP67級別嘅防水防塵認證，電池容量為4,000 mAh，喺極耗電嘅120Hz螢幕更新率下可以使用10小時。手機將於11月24日於香港發售，售價為港幣6,799元，而3香港就會早一日11月23日於銅鑼灣旗艦店發售。