科技大亨Elon Musk旗下嘅SpaceX近日獲得美國聯邦通信委員會(FCC)一致通過，批准SpaxeX聯同加拿大電信公司Telesat、LeoSat及Kepler Communication等4間公司發射被稱為Starlink嘅衛星互聯網項目，呢種衛星技術可以為鄉村及偏遠地區嘅美國人提供高速上網服務。

Elon Musk最近積極參與有利民生嘅科技項目，日前先提出佢旗下嘅The Boring Company未來希望透過挖洞技術改善城市地下管道系統，而家仲有衛星互聯網項目，可以話係有地底玩到上太空。其實FCC早於今年3月已經批准SpaceX向太空發射4425顆衛星，而啱啱新批准嘅7518顆衛星將於較低軌道嘅335至346千米高度運行。

到目前為止，SpaceX向太空發射咗兩顆測試衛星TinTin A及B，Elon Musk指出兩顆衛星在喺發射後運行良好。而FCC主席Ajit Pai喺每月例會上表示，衛星技術可以為鄉村及偏遠地區嘅美國人提供高速上網服務，喺颶風及其他自然災害導致通訊中斷嘅時候，呢項技術亦係重要嘅後備。

來源：Engadget