仲記唔記得上星期五同大家講過，Apple Watch新嘅watchOS 5.1.2更新帶嚟咗Apple Watch Series 4最強大嘅ECG心電圖功能？呢個功能推出咗無幾耐已經成功救人喇！嚟自外國討論區Reddit嘅用戶edentel，啟用心電圖功能後發現自己有「心房顫動」症狀，該用戶起初仲以為隻錶壞咗添。

嚟自Reddit嘅用戶edentel上星期喺將Apple Watch Series 4升級watchOS 5.1.2後，急不及待一朝早就使用咗新推出嘅ECG心電圖功能，但佢發現無論點測試結果都係顯示佢出現「心房顫動」症狀嘅警告。後來佢妻子起身戴起手錶測試後發現手錶無任何警告，而edentel更手錶戴去另一隻手試一試，警告又再一次出現，嚇到佢即刻附近醫院搵醫生檢查。

去到醫院後，醫生望咗眼edentel嘅Apple Watch所顯示嘅ECG螢幕結果就同佢講，「你應該去買蘋果股票，佢可能救咗你一命。我噚晚聽到有呢個功能後，都估到呢個星期有心臟問題嘅病人會增加，估唔到今朝第一個病人就遇到！」，最後醫生立即將佢轉介畀另一位心臟專家進行詳細檢查。

來源：Reddit