經歷過因航、環聯洩漏客戶私隱資料後，相信一眾香港人都比以往更著重私人資料嘅安全。喺近日中美角力鬥得如火如荼之際，做過保安局局長嘅立法會議員葉劉淑儀喺晨一個電台節目中表示，「我唔會用蘋果，覺得唔係好安全」，仲透露未來使用由中國外交部發言人華春瑩建議美國總統特朗普使用嘅華為手機，作為精明嘅香港人，聽完前保安局局長嘅意見一定會識揀！

近日中美貿易戰停戰90日嘅消息一下子被華為CFO孟晚舟於加拿大被捕一事徹底蓋過。喺呢個敏感時刻，前保安局局長、新民黨主席葉劉淑儀就喺今朝香港電台一個節目中透露指，而家用緊Samsung智能手機，仲指出通訊器材「從安全理由嚟睇，用所有美國貨都係危險嘅」，同時表示「我唔會用蘋果，覺得唔係好安全」。

葉劉認為，因為美國有權監察手機，而且政治人物都會有敏感通訊資料，所以除非無替代品，否則日後都會盡量避免用美國貨。葉劉續指，未來換手機都會轉用華為，因為佢好支持呢間表現好嘅公司，又指出用中國製軟件硬件會安全啲。而另一前保安局局長黎棟國今朝就喺另一電台節目表示，自己用咗小米電話好耐，又大讚小米「平、靚、正」。

來源：明報、RTHK