相信大家都有聽過飛行車、空中的士等嘅新聞，Uber、空中巴士及勞斯萊斯等公司亦分別發展緊呢項計劃，但短期內都未有咁快面世。而嚟自美國嘅公司Lift Aircraft正準備推出一款名為「Hexa」，裝有18個螺旋槳嘅電動垂直起降(EVTOL)飛機，主要用於短途觀光娛樂，而「Hexa」已經喺上個月完成咗首次飛行測試，明年有望實現載客計劃。

由Lift Aircraft研發嘅呢款單座多旋翼飛行汽車名為「Hexa」，成部機重432磅(196Kg)，而喺機內有一個簡單、輕便嘅碳纖單座位機艙，每次飛行嘅續航時間約為10至15分鐘。不過「Hexa」嘅飛行高度限制於700英尺以下，又唔可以喺人口稠密嘅上空飛行，佢嘅最高時速約100km/h。

Lift Aircraft CEO Matt Chasen表示，多座位嘅電動垂直起降(EVTOL)飛機量產可能需要10年時間，而且需要新法規及電池技術有重大突破先可以保證EVTOL嘅實用性及安全性，所以佢哋發展單座位EVTOL係想比其他人更早進入市場，唔需要等待有重大技術或監管制度突破先發展。

來源：TechCrunch